Azərbaycan tarixinin qəhrəmanlıq salnaməsində Qubadlının azad edilməsi xüsusi yer tutur. 25 Oktyabr – Qubadlı şəhəri günü xalqımızın azadlıq iradəsini, Vətən sevgisini və müstəqilliyimiz uğrunda apardığımız mübarizənin əzəmətini nümayiş etdirən əlamətdar tarixdir.
2020-ci il oktyabrın 25-də Azərbaycan Ordusunun qəhrəmanlığı sayəsində Qubadlı şəhəri işğaldan azad edildi. Bu qələbə Ali Baş Komandan İlham Əliyevin rəhbərliyi, ordumuzun yüksək döyüş hazırlığı və xalqımızın sarsılmaz həmrəyliyi nəticəsində əldə olunan tarixi Zəfərin mühüm tərkib hissəsi oldu.
Qubadlının azadlığı uğrunda döyüşən qəhrəman hərbçilərimiz Vətən torpağının hər qarışı üçün böyük fədakarlıq göstərdilər. Şəhidlərimizin qanı bahasına qazanılmış bu qələbə xalqımızın yaddaşında əbədi yaşayacaq. Onların əziz xatirəsini yad etmək, qazilərimizə ehtiram göstərmək hər birimizin mənəvi borcudur.
Qubadlı şəhəri günü yalnız keçmişdə qazanılmış qələbəni xatırlamaq üçün deyil, həm də gələcək nəsillərə vətənpərvərlik ruhunu aşılamaq üçün mühüm fürsətdir. Gənclərimiz bu tarixi bilməli, şəhidlərimizin qəhrəmanlığını öyrənməli və doğma torpaqlarımızın qorunmasının əhəmiyyətini dərindən dərk etməlidirlər.
Bu gün Azərbaycan dövləti azad edilmiş ərazilərdə quruculuq işlərini davam etdirir, Qubadlının inkişafı və dirçəldilməsi üçün mühüm addımlar atır. Şəhərin gələcək inkişafı Vətən uğrunda canından keçən qəhrəmanlarımızın arzularının yaşadılmasının da rəmzidir.
25 Oktyabr – Qubadlı şəhəri günü münasibətilə bütün şəhidlərimizin əziz xatirəsini dərin ehtiramla anır, qazilərimizə möhkəm cansağlığı arzulayırıq. Qubadlının azadlığı Azərbaycan xalqının birliyinin, iradəsinin və Vətənə sonsuz məhəbbətinin unudulmaz təntənəsidir.
Simran Süleymanov,
YAP Şabran rayon təşkilatının mühasibi
