Müasir dünyada sülhün və təhlükəsizliyin qorunması dövlətlərdən qarşılıqlı hörmət, məsuliyyət və beynəlxalq hüquq normalarına riayət olunmasını tələb edir. Azərbaycan Respublikasının Prezidenti İlham Əliyevin 2026-cı il oktyabrın 15-də Bakıda keçirilən AQEM-in 7-ci Zirvə Görüşündəki çıxışı bu baxımdan mühüm siyasi mesajlarla yadda qalıb.
Dövlət başçısı çıxışında dövlətlərarası münaqişələrin həllində ikili standartların tətbiqinə və seçici yanaşmalara qarşı Azərbaycanın mövqeyini ifadə edib. Prezident vurğulayıb ki, beynəlxalq təşkilatların qəbul etdiyi qərarların icrası təmin edilmədikdə münaqişələrin davam etməsi və yeni qarşıdurmaların yaranması təhlükəsi artır.
Azərbaycanın müstəqilliyini bərpa etdiyi dövrdən etibarən qarşılaşdığı çətinliklərə toxunan Prezident İlham Əliyev Ermənistanın işğal siyasətinin ölkəmizə vurduğu ağır zərəri diqqətə çatdırıb. Uzun illər ərzində ərazilərimizin işğal altında qalması, insanların doğma torpaqlarından didərgin salınması və yaşayış məntəqələrinin dağıdılması regionda ədalətin bərqərar olunmasının vacibliyini göstərən tarixi faktlar kimi qeyd edilib.
Dövlət başçısı Azərbaycanın suverenliyini və ərazi bütövlüyünü bərpa etdikdən sonra Ermənistana sülh təklif etdiyini vurğulayıb. Bu mövqe ölkəmizin gələcəyə yönəlmiş siyasətinin, regional sabitliyin möhkəmləndirilməsinə və uzunmüddətli sülhün təmin olunmasına verdiyi önəmin ifadəsidir.
Prezident İlham Əliyevin çıxışında səsləndirilən fikirlər beynəlxalq hüququn bütün dövlətlərə eyni qaydada tətbiq edilməsinin vacibliyini bir daha gündəmə gətirib. Ədalətli beynəlxalq münasibətlər sistemi yalnız qəbul edilmiş qərarların həyata keçirilməsi, dövlətlərin suverenliyinə hörmət və münaqişələrin sülh yolu ilə həlli əsasında formalaşa bilər.
Bakı Zirvə Görüşü çərçivəsində səsləndirilən mesajlar Azərbaycanın milli maraqlarını qorumaqla yanaşı, beynəlxalq təhlükəsizliyin möhkəmləndirilməsinə və dövlətlər arasında etimadın artırılmasına yönəlmiş mövqeyini əks etdirib.
Nəticə etibarilə, Prezident İlham Əliyevin çıxışı sülhün davamlı olması üçün ədalətin, beynəlxalq hüququn və qarşılıqlı məsuliyyətin əsas şərtlər olduğunu bir daha təsdiqləyib.
Cavani Babayev,
YAP Şabran rayon təşkilatının sədr müavini
