Asiya qitəsində qarşılıqlı etimadın möhkəmləndirilməsi, iqtisadi əlaqələrin genişləndirilməsi və təhlükəsizlik sahəsində əməkdaşlığın inkişaf etdirilməsi müasir dövrün əsas çağırışlarındandır. Bakıda keçirilən AQEM-in 7-ci Zirvə Görüşündə Prezident İlham Əliyevin səsləndirdiyi fikirlər təşkilatın gələcək inkişaf perspektivləri baxımından mühüm əhəmiyyət daşıyır.
Prezident İlham Əliyev çıxışında Azərbaycanın AQEM-ə sədrliyi dövründə təşkilatın gücləndirilməsinə xüsusi diqqət yetirildiyini bildirib. Nəqliyyat, bağlantılar, rəqəmsallaşma, ətraf mühit, turizm, təhsil və elm sahələrində əməkdaşlığın təşviqi üzv dövlətlər arasında qarşılıqlı faydalı münasibətlərin inkişafına xidmət edir.
Azərbaycanın coğrafi mövqeyi ölkəmizə Asiya ilə Avropa arasında iqtisadi və nəqliyyat əlaqələrinin inkişafında mühüm rol oynamaq imkanı verir. Ölkəmizin beynəlxalq nəqliyyat dəhlizlərinin inkişafında iştirakı, enerji sahəsində tərəfdaşlıqları və çoxtərəfli əməkdaşlıq təşəbbüsləri Avrasiya məkanında əlaqələrin möhkəmlənməsinə şərait yaradır.
Zirvə görüşünün mühüm hadisələrindən biri Laos Xalq Demokratik Respublikasının AQEM-ə üzv qəbul edilməsi olub. Bu addım təşkilatın daha geniş əhatəli dialoq platformasına çevrilməsi istiqamətində atılan əhəmiyyətli addımdır.
Təşkilatın fəaliyyətinin institusional və hüquqi baxımdan gücləndirilməsi də diqqət çəkən məsələlərdəndir. Üzv dövlətlərin qarşılıqlı razılığı əsasında həyata keçirilən təşəbbüslər AQEM-in regional təhlükəsizlik, iqtisadi inkişaf və anlaşma sahələrində imkanlarını genişləndirir.
Azərbaycanın sədrliyinin 2026–2028-ci illəri əhatə edən növbəti dövr üçün uzadılmasının dəstəklənməsi ölkəmizin təşkilat çərçivəsində fəaliyyətinə göstərilən etimadın ifadəsidir. Bu qərar əməkdaşlıq istiqamətlərinin davamlılığının qorunması və yeni təşəbbüslərin reallaşdırılması üçün əlavə imkanlar yaradır.
Prezident İlham Əliyevin çıxışı göstərir ki, Azərbaycanın AQEM çərçivəsində əsas məqsədlərindən biri dövlətlər arasında dialoqu gücləndirmək, ortaq maraqlara əsaslanan əməkdaşlığı inkişaf etdirmək və Asiyada davamlı tərəfdaşlığa töhfə verməkdir.
Beləliklə, Bakı Zirvə Görüşü daha güclü AQEM-in formalaşdırılması və Asiya ölkələri arasında qarşılıqlı etimadın möhkəmləndirilməsi istiqamətində mühüm mərhələ kimi qiymətləndirilə bilər.
Elçin İbrahimov,
YAP Şabran rayon təşkilatının məsləhətçisi
