20 Oktyabr – Zəngilan şəhəri günü işğaldan azad edilmiş ərazilərimizdə başlanan yeni həyatın, quruculuğun və inkişafın rəmzidir. Bu gün Zəngilanın keçdiyi tarixi yol, azadlıq uğrunda mübarizəsi və gələcəyə doğru atdığı addımlar xüsusi ehtiramla yad edilir.
Zəngilanın azad edilməsi Azərbaycan xalqının çoxəsrlik dövlətçilik tarixində mühüm hadisədir. 2020-ci il oktyabrın 20-də əldə edilən bu qələbə Vətən müharibəsinin taleyində əhəmiyyətli rol oynadı və xalqımızın Zəfər əzmini daha da gücləndirdi.
Hazırda Zəngilanda həyata keçirilən genişmiqyaslı layihələr bölgənin iqtisadi potensialının reallaşdırılmasına, müasir yaşayış mühitinin yaradılmasına və əhalinin doğma yurdlarına qayıdışına xidmət edir. İnfrastrukturun yenilənməsi, kənd təsərrüfatı və turizm imkanlarının inkişafı, yeni iş yerlərinin yaradılması regionun gələcək tərəqqisi üçün mühüm əhəmiyyət daşıyır.
Böyük Qayıdış proqramı çərçivəsində həyata keçirilən tədbirlər doğma torpaqlarından ayrı düşmüş insanların öz evlərinə qayıtmasına, burada təhlükəsiz və firavan həyat qurmasına imkan yaradır. Zəngilanın yenidən qurulması dövlətimizin gücünü və xalqımızın gələcəyə olan inamını nümayiş etdirir.
Zəngilan şəhəri günü münasibətilə bütün xalqımızı təbrik edir, doğma torpaqlarımızın abadlaşmasını, bölgədə davamlı inkişafın və rifahın möhkəmlənməsini arzulayırıq. Zəngilanın azadlığı və dirçəlişi Azərbaycanın şanlı tarixinin ayrılmaz hissəsidir.
Simran Süleymanov,
YAP Şabran rayon təşkilatının mühasibi
