1918-ci il mayın 28-də Azərbaycan xalqı tarixi bir addım atdı — Şərqdə və müsəlman aləmində ilk demokratik, hüquqi, dünyəvi parlament respublikasını qurdu. Azərbaycan Xalq Cümhuriyyətinin Milli Şurası həmin gün İstiqlal Bəyannaməsini imzalayaraq xalqımızın müstəqilliyini dünyaya elan etdi.
Cəmi 23 ay mövcud olmasına baxmayaraq, Azərbaycan Xalq Cümhuriyyəti qısa müddət ərzində çox mühüm nailiyyətlər əldə etdi:
• Azərbaycanın ilk parlamenti və hökuməti yaradıldı
• Milli ordu quruldu, Bakı işğalçılardan azad edildi
• Azərbaycan vətəndaşlığı institutu təsis edildi
• Bütün vətəndaşlara irqi, milli, dini ayrı-seçkilik olmadan bərabər hüquqlar verildi
• 1919-cu ildə Bakı Dövlət Universiteti açıldı
• Ədliyyə Nazirliyi məhz 28 May 1918-ci ildə təsis edildi
Müstəqilliyin Bərpası və Davam Etdirilməsi
1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı qəbul olundu. Bu aktda Azərbaycan Respublikasının Azərbaycan Xalq Cümhuriyyətinin varisi olduğu rəsmi olaraq təsbit edildi.
Ümummilli Lider Heydər Əliyev çətin siyasi-iqtisadi şəraitdə dövlətçiliyi qoruyub saxladı. Sovet İttifaqı hələ mövcud ikən, 1990-cı il noyabrın 17-də Naxçıvan Ali Məclisinin sessiyasında üçrəngli bayrağı rəsmi dövlət bayrağı kimi qaldırmaqla müstəqilliyə gedən yolun əsasını qoydu.
“Müstəqilliyi qorumaq, saxlamaq o müstəqilliyi əldə etməkdən qat-qat çətin bir vəzifə idi.”
— Ulu Öndər Heydər Əliyev
Müasir Azərbaycan və 28 May
2021-ci ildə qəbul olunmuş “Müstəqillik günü haqqında” Qanunla 28 May rəsmi olaraq Müstəqillik Günü elan edildi. Bu tarix Azərbaycanın dövlət suverenliyinin məhz 1918-ci ildə bərqərar olunması həqiqətinə əsaslanır.
Prezident İlham Əliyevin rəhbərliyi ilə Azərbaycan ərazi bütövlüyünü bərpa etdi. 1918-ci ildə qaldırılan üçrəngli bayraq bu gün işğaldan azad olunmuş ərazilərdə — o cümlədən Laçında — qürurla dalğalanır.
“Müstəqilliyimiz əbədidir, dönməzdir, sarsılmazdır! Yaşasın güclü, müstəqil Azərbaycan!”
— Prezident İlham Əliyev
28 May təkcə bir tarix deyil — xalqımızın azadlıq əzminin, dövlətçilik iradəsinin və gələcəyə inamının rəmzidir.
Vüsal Osmanov,
YAP Nizami rayon təşkulatının fəalı
