2026-cı il iyunun 1-də Bakıda keçirilən Bakı Enerji Həftəsinin rəsmi açılış mərasimində Azərbaycan Respublikasının Prezidenti İlham Əliyev geniş və əhatəli çıxış edib. Dövlət başçısı çıxışında Azərbaycanın enerji siyasətinin uğurlarından, beynəlxalq əməkdaşlığın əhəmiyyətindən və ölkəmizin qlobal enerji təhlükəsizliyində oynadığı strateji roldan danışıb. Prezident qeyd edib ki, Azərbaycan illərdir etibarlı tərəfdaş kimi dünyanın enerji xəritəsində mühüm mövqeyə malikdir.
Prezident İlham Əliyev bildirib ki, Azərbaycanın həyata keçirdiyi enerji layihələri yalnız iqtisadi deyil, həm də siyasi və geostrateji baxımdan böyük əhəmiyyət daşıyır. Xüsusilə Cənub Qaz Dəhlizi layihəsinin Avropanın enerji təhlükəsizliyinə mühüm töhfə verdiyi vurğulanıb. Dövlət başçısı qeyd edib ki, enerji sahəsində qurulan beynəlxalq əməkdaşlıq qarşılıqlı etimada və uzunmüddətli tərəfdaşlığa əsaslanır.
Çıxış zamanı bərpa olunan enerji sahəsinə də xüsusi diqqət ayrılıb. Prezident vurğulayıb ki, Azərbaycan yaşıl enerji strategiyasını uğurla həyata keçirir və bu istiqamətdə beynəlxalq şirkətlərlə əməkdaşlıq genişlənir. Qarabağ və Şərqi Zəngəzur bölgələrinin “yaşıl enerji zonası” elan olunması ölkənin gələcək enerji siyasətinin əsas prioritetlərindən biri kimi təqdim edilib.
Prezident İlham Əliyev Azərbaycanın nəqliyyat və logistika imkanlarının da enerji layihələri üçün mühüm üstünlük yaratdığını bildirib. Dövlət başçısı qeyd edib ki, ölkəmiz Şərqlə Qərbi birləşdirən mühüm nəqliyyat dəhlizlərinin mərkəzində yerləşir və bu amil iqtisadi əməkdaşlığın genişlənməsinə əlavə imkanlar yaradır. Çıxışda beynəlxalq tərəfdaşlarla münasibətlərdən də bəhs olunub. Prezident Azərbaycanın müxtəlif ölkələr və beynəlxalq şirkətlərlə qarşılıqlı faydalı əməkdaşlıq qurduğunu, bu münasibətlərin gələcəkdə daha da genişlənəcəyini vurğulayıb.
Bakı Enerji Həftəsinin dünya enerji sektorunun aparıcı platformalarından biri olduğunu bildirən Prezident İlham Əliyev forumun beynəlxalq dialoq və əməkdaşlıq baxımından böyük əhəmiyyət daşıdığını deyib. Onun sözlərinə görə, belə tədbirlər qlobal çağırışların müzakirəsi və ortaq həll yollarının müəyyənləşdirilməsi üçün vacib rol oynayır.
Sonda Prezident İlham Əliyev Azərbaycanın bundan sonra da etibarlı enerji tərəfdaşı olaraq beynəlxalq əməkdaşlığa töhfə verəcəyini bildirib. Dövlət başçısının çıxışı ölkəmizin enerji siyasətinin gələcək hədəflərini və qlobal miqyasda artan nüfuzunu bir daha nümayiş etdirib.
Yalçın İsmayılov,
YAP Ağstafa rayon təşkilatının sədr müavini
