Azərbaycan və Özbəkistan arasında formalaşmış münasibətlər bu gün türk dünyasında qardaşlıq, qarşılıqlı etimad və səmərəli əməkdaşlığın mühüm nümunələrindən biridir. Ortaq tarixi köklər, dil və mədəni yaxınlıq, mənəvi dəyərlər, eləcə də xalqlarımız arasında əsrlər boyu mövcud olan səmimi münasibətlər dövlətlərarası əlaqələrin möhkəm təməlini təşkil edir. Bu təməl üzərində inkişaf edən siyasi dialoq son illərdə daha da intensivləşərək yüksək səviyyəyə yüksəlib.
Müasir Azərbaycan-Özbəkistan münasibətlərinin əsas xüsusiyyətlərindən biri dövlət başçıları arasında mövcud olan sıx və səmimi əlaqələrdir. Son beş il ərzində ən yüksək səviyyədə həyata keçirilən 15 qarşılıqlı səfər və müntəzəm təmaslar iki ölkə arasındakı siyasi dialoqun dinamikliyini aydın şəkildə nümayiş etdirir. Dövlət rəhbərlərinin tez-tez görüşməsi mövcud əməkdaşlıq istiqamətlərinin müzakirəsinə, yeni təşəbbüslərin irəli sürülməsinə və qəbul edilən qərarların ardıcıl şəkildə həyata keçirilməsinə əlverişli imkan yaradır.
Azərbaycan Respublikasının Prezidenti İlham Əliyevin qardaş Özbəkistana müntəzəm səfərləri də əlaqələrin xüsusi xarakter daşıdığını göstərir. Son beş il ərzində dövlət başçısının üçüncü dövlət səfərini və ümumilikdə yeddinci səfərini qardaş ölkəyə etməsi Azərbaycan-Özbəkistan münasibətlərinin inkişafına verilən böyük önəmin ifadəsidir. Bu səfərlərin hər biri yeni razılaşmaların əldə olunması, əməkdaşlığın müxtəlif sahələr üzrə genişləndirilməsi və mövcud tərəfdaşlığın daha da möhkəmləndirilməsi baxımından mühüm əhəmiyyət daşıyır.
Özbəkistana edilən səfərlərin qardaşlıq, səmimiyyət, qonaqpərvərlik və qarşılıqlı anlaşma şəraitində keçməsi iki xalq arasındakı münasibətlərin dərin köklərə malik olduğunu nümayiş etdirir. Bu münasibətlər yalnız rəsmi diplomatik çərçivə ilə məhdudlaşmır. Xalqların bir-birinə bəslədiyi hörmət və rəğbət dövlətlər arasında yaranmış yüksək səviyyəli siyasi əlaqələrin mühüm mənəvi dayaqlarından birinə çevrilib.
Son illərdə Özbəkistanın keçdiyi inkişaf yolu xüsusi diqqət çəkir. Ölkədə həyata keçirilən genişmiqyaslı islahatlar, müasir şəhərlərin salınması, infrastrukturun yenilənməsi və iqtisadiyyatın şaxələndirilməsi yeni inkişaf mərhələsinin əsas xüsusiyyətləri kimi qiymətləndirilə bilər. Elm, təhsil, mədəniyyət və idman sahələrinə göstərilən diqqət isə cəmiyyətin hərtərəfli inkişafına xidmət edən siyasətin mühüm istiqamətlərini təşkil edir.
Özbəkistanda iqtisadi və sosial sahələrdə həyata keçirilən dəyişikliklər ölkənin inkişaf potensialının daha səmərəli şəkildə reallaşdırılmasına imkan verir. Müasir infrastruktur layihələrinin həyata keçirilməsi, sənaye və kənd təsərrüfatının inkişafı, yeni istehsal sahələrinin yaradılması, şəhər və rayonların simasının yenilənməsi ölkənin dinamik tərəqqisini əyani şəkildə göstərir. Bu proseslər həm Özbəkistanın iqtisadi imkanlarını genişləndirir, həm də regionda onun mövqeyinin möhkəmlənməsinə şərait yaradır.
Özbəkistan Respublikasının Prezidenti Şavkat Mirziyoyevin rəhbərliyi ilə həyata keçirilən ardıcıl siyasət ölkənin kompleks inkişafına mühüm təsir göstərir. Müxtəlif sahələrdə aparılan islahatlar dövlət idarəçiliyinin təkmilləşdirilməsinə, iqtisadi imkanların genişləndirilməsinə və cəmiyyətin rifahının yüksəldilməsinə yönəlib. Prezidentin strateji baxışı və gələcəyə hesablanmış qərarları Özbəkistanın beynəlxalq nüfuzunun artmasına da mühüm töhfə verir.
Şavkat Mirziyoyevin rəhbərliyi dövründə ölkənin əsas sahələr üzrə inkişafının təmin edilməsi məqsədilə həyata keçirilən genişmiqyaslı fəaliyyət diqqətəlayiq nəticələr verir. Dövlət idarəçiliyində səmərəliliyin artırılması, iqtisadi islahatların dərinləşdirilməsi, investisiya imkanlarının genişləndirilməsi və insan kapitalının inkişafına yönəlmiş siyasət Özbəkistanın müasir inkişaf modelinin mühüm komponentlərindəndir.
Bu uğurların arxasında düşünülmüş dövlət siyasəti, strateji baxış və ölkənin gələcək inkişafına dair aydın hədəflər dayanır. Vətənə bağlılıq, milli maraqların qorunması və xalqın rifahının yüksəldilməsi məqsədi ilə həyata keçirilən fəaliyyət Özbəkistanın inkişaf tempinin davamlı xarakter almasına şərait yaradır. Səmərəli idarəçilik mexanizmləri isə müəyyən edilmiş prioritetlərin real nəticələrə çevrilməsində mühüm rol oynayır.
Azərbaycan ilə Özbəkistan arasında siyasi dialoqun yüksək səviyyəsi digər sahələrdə əməkdaşlığın inkişafı üçün də geniş imkanlar açır. Siyasi etimad iqtisadi münasibətlərin genişlənməsinə, qarşılıqlı investisiyaların artmasına, ticarət əlaqələrinin möhkəmlənməsinə və yeni birgə layihələrin həyata keçirilməsinə şərait yaradır. Nəqliyyat, logistika, energetika, kənd təsərrüfatı, sənaye və digər istiqamətlərdə əməkdaşlığın genişləndirilməsi hər iki ölkənin qarşılıqlı maraqlarına cavab verir.
Mədəni-humanitar sahədə əlaqələrin inkişafı da dövlətlərarası münasibətlərin mühüm istiqamətlərindən biridir. Ortaq dil və mənəvi dəyərlər xalqlarımızın bir-birini daha yaxından tanıması üçün əlverişli şərait yaradır. Mədəniyyət günlərinin keçirilməsi, elm və təhsil müəssisələri arasında əməkdaşlığın genişlənməsi, gənclərin qarşılıqlı əlaqələrinin inkişafı gələcək nəsillərin də qardaşlıq ruhunda formalaşmasına xidmət edir.
Azərbaycan və Özbəkistanın regional və beynəlxalq məsələlərdə oxşar mövqelərdən çıxış etməsi siyasi münasibətlərin möhkəmliyini göstərən mühüm amillərdəndir. Hər iki dövlət suverenlik, müstəqillik, ərazi bütövlüyü və beynəlxalq hüququn prinsiplərinə hörmət əsasında siyasət yürüdür. Bu yanaşmalar ortaq maraqların müdafiəsi və regional əməkdaşlığın genişləndirilməsi üçün etibarlı zəmin yaradır.
Cahan Bayramlı,
YAP Xətai rayon təşkilatı
