Azərbaycan Respublikasının Prezidenti İlham Əliyevin 21 avqust 2026-cı ildə Özbəkistanın Milli İnformasiya Agentliyinə verdiyi müsahibə iki qardaş ölkə arasında münasibətlərin bugünkü səviyyəsini və gələcək inkişaf istiqamətlərini əks etdirən mühüm siyasi mesajlarla zəngindir. Müsahibə Prezident İlham Əliyevin Özbəkistana gözlənilən dövlət səfəri ərəfəsində baş tutması baxımından da xüsusi əhəmiyyət daşıyır.
Müsahibədə Azərbaycan və Özbəkistan prezidentləri arasında formalaşmış səmimi dostluq, qarşılıqlı etimad və siyasi dialoqun münasibətlərin inkişafında mühüm rol oynadığı xüsusi qeyd olunur. Prezident İlham Əliyev Özbəkistan Prezidenti Şavkat Mirziyoyevin iki ölkə arasında qardaşlıq və müttəfiqliyin möhkəmləndirilməsi istiqamətində fəaliyyətini yüksək qiymətləndirib. Bu siyasi iradə Azərbaycan–Özbəkistan əlaqələrinin strateji xarakter daşımasına mühüm zəmin yaradır.
Azərbaycan və Özbəkistan arasında əməkdaşlıq yalnız siyasi münasibətlərlə məhdudlaşmır. İqtisadiyyat, investisiya, nəqliyyat, enerji, mədəniyyət, humanitar əlaqələr və digər sahələrdə birgə layihələrin həyata keçirilməsi iki ölkənin tərəfdaşlığını daha da möhkəmləndirir. Xüsusilə regionlararası əlaqələrin genişlənməsi xalqlar arasında münasibətlərin daha da dərinləşməsinə xidmət edir.
Müsahibənin mühüm istiqamətlərindən biri də Azərbaycanla Mərkəzi Asiya arasında əlaqələrin perspektivləri ilə bağlı fikirlərdir. Azərbaycanın Mərkəzi Asiya ölkələri ilə tarixi, mədəni və strateji bağlarının gücləndirilməsi ölkəmizin Türk dünyasında əməkdaşlığın inkişafına verdiyi töhfəni nümayiş etdirir. Xəzər dənizi və nəqliyyat-kommunikasiya layihələri Azərbaycanı Mərkəzi Asiya ilə Avropa arasında mühüm əlaqələndirici mərkəzlərdən birinə çevirir.
Ümumilikdə, Prezident İlham Əliyevin Özbəkistanın Milli İnformasiya Agentliyinə müsahibəsi Azərbaycan–Özbəkistan münasibətlərinin strateji mahiyyətini bir daha nümayiş etdirir. Müsahibədən aydın görünür ki, iki ölkə arasında mövcud müttəfiqlik yalnız siyasi sənədlərlə deyil, xalqların tarixi və mənəvi yaxınlığı, qarşılıqlı etimad və konkret əməkdaşlıq layihələri ilə möhkəmlənir.
Azərbaycan və Özbəkistanın qarşılıqlı dəstəyi və birgə təşəbbüsləri Türk dünyasının birliyinin və regional əməkdaşlığın güclənməsinə də mühüm töhfə verir. Bu baxımdan Prezident İlham Əliyevin müsahibəsi Azərbaycan–Özbəkistan qardaşlığının yeni mərhələyə qədəm qoyduğunu və qarşıdakı dövrdə əlaqələrin daha geniş strateji məzmun kəsb edəcəyini göstərən mühüm siyasi mesaj kimi qiymətləndirilə bilər.
Yalçın İsmayılov,
YAP Ağstafa rayon təşkilatının sədr müavini
