1918-ci il mayın 28-i dünya tarixinə, xüsusən də Müsəlman Şərqinin tarixinə əbədi olaraq həkk olunmuş bir gündür. Həmin gün Azərbaycan Milli Şurası Azərbaycanın müstəqilliyini elan etdi və bu tarixi addımla yalnız bir dövlət deyil, bütün Şərqin demokratik gələcəyinin bünövrəsi qoyuldu.
Azərbaycan Xalq Cümhuriyyəti — tarixdə Müsəlman Şərqinin ilk demokratik, hüquqi, dünyəvi parlament respublikası elan edildi. Bu, təkcə coğrafi bir bölgənin deyil, sivilizasiyanın yeni səhifəsinin başlanğıcı idi. Müsəlman dünyasında belə bir dövlət modeli nümunəsinin məhz Azərbaycan tərəfindən yaradılması, onun tarixi missiyasını bütün dünyaya bəyan etdi.
Azərbaycan Xalq Cümhuriyyəti 23 aylıq qısa ömrü ərzində nəsillərə unudulmaz bir iz qoydu. Bu dövrdə:
– Qadınlara seçki hüququ verildi — Şərqdə ilk dəfə olaraq. Bu S Avropanın bir çox ölkəsindən belə öndə idi.
– Azərbaycan Dövlət Universiteti quruldu — elm və maarifin inkişafına möhkəm zəmin yaradıldı.
– Milli ordu yaradıldı, milli bayraq, himn və digər dövlət atributları müəyyənləşdirildi.
– 27 dövlətlə diplomatik əlaqələr yaradıldı — arenada tanınma istiqamətində mühüm addımlar atıldı.
1991-ci ildə yenidən qazanılan müstəqillik Azərbaycan Xalq Cümhuriyyətinin ruhunun yenidən dirilməsi idi. Ulu Öndər Heydər Əliyevin dönməz siyasi iradəsi və fədakarlığı sayəsində Azərbaycan öz dövlətçiliyini qoruyub saxlaya bildi. O, ağır sınaqlar qarşısında xalqını birləşdirdi, dövlətçiliyin möhkəmləndirilməsi üçün yorulmadan çalışdı.
28 May — Respublika Günü — məhz bu tarixi irsin rəsmi etirafıdır. Bu gün yalnız keçmişi deyil, Azərbaycanın demokratiya, hüquq dövləti və dünyəvi dəyərlər zəminində qurulmuş gələcəyini də təmsil edir.
Azərbaycan Xalq Cümhuriyyətinin mirası kimi bu gün üçrəngli bayrağımız işğaldan azad edilmiş ərazilərdə — Şuşada, Laçında, Cəbrayılda — iftixarla dalğalanır. Bu mənzərə Prezident İlham Əliyevin tarixi zəfərinin, gələcək nəsillərə əmanət etdiyi unudulmaz dövlətçilik dərsinin ən parlaq ifadəsidir.
Azərbaycanın üçrəngli bayrağı — mavi, qırmızı, yaşıl — 1918-ci ildə Xalq Cümhuriyyəti tərəfindən qəbul edilmişdir. Bu bayraq bugün 44 günlük müharibənin qalibiyyəti ilə tarixi torpaqlarda yenidən qaldırılmışdır. Bu fakt Azərbaycanın tarixdə tam bir dövr dövrəsini tamamladığını simvolizə edir.
28 May — sadəcə bir tarix deyil. Bu gün Azərbaycanın kimliyi, iradəsi və gücünün simvoludur. Şərqin ilk demokratik parlament respublikasını yaradan xalq, bu demokratik ruhla 100 ildən artıq bir zaman kəsiyini aşaraq öz müstəqilliyini qorumuş, torpaqlarını azad etmiş və gələcəyə əminliklə addımlamışdır.
Günay Süleymanova,
Bakı Slavyan Universiteti Roman-german dilləri kafedrası
