2026-cı il mayın 4-də İtaliya Respublikası Nazirlər Şurasının sədri Ciorciya Meloninin Azərbaycana səfəri ölkələrimiz arasında mövcud olan yüksək səviyyəli siyasi dialoqun və strateji tərəfdaşlığın növbəti mühüm təzahürü kimi qiymətləndirilir. Səfər çərçivəsində Yeni Azərbaycan Partiyasının Sədri, Prezident İlham Əliyev ilə keçirilən görüşlər, aparılan müzakirələr və mətbuata verilən bəyanatlar bir daha göstərdi ki, Azərbaycan–İtaliya münasibətləri qarşılıqlı hörmət, etimad və ortaq maraqlar əsasında uğurla inkişaf edir.
Prezident İlham Əliyev mətbuata bəyanatında Azərbaycan ilə İtaliya arasında münasibətlərin çoxşaxəli xarakter daşıdığını xüsusi vurğulayaraq bildirdi ki, iki ölkə arasında siyasi əlaqələr yüksək səviyyədədir və müntəzəm qarşılıqlı səfərlər əməkdaşlığın daha da genişlənməsinə xidmət edir. Dövlət başçısı qeyd etdi ki, İtaliya Azərbaycanın əsas strateji tərəfdaşlarından biridir və bu əməkdaşlıq yalnız iqtisadi sahə ilə məhdudlaşmır, enerji, nəqliyyat, sənaye, humanitar və mədəni istiqamətləri də əhatə edir.
Azərbaycan ilə İtaliya arasında münasibətlərin əsas sütunlarından biri enerji əməkdaşlığıdır. Prezident İlham Əliyevin qeyd etdiyi kimi, Azərbaycan uzun illərdir ki, Avropanın enerji təhlükəsizliyinin təmin olunmasında mühüm rol oynayır və İtaliya bu əməkdaşlıqda əsas tərəfdaşlardan biridir. Xüsusilə Cənub Qaz Dəhlizinin mühüm hissəsi olan TAP layihəsi vasitəsilə Azərbaycan qazının Avropa bazarına, o cümlədən İtaliyaya çatdırılması tərəflər arasında qarşılıqlı faydalı əməkdaşlığın ən parlaq nümunələrindəndir. Bu layihə yalnız iqtisadi deyil, həm də geosiyasi baxımdan böyük əhəmiyyət daşıyır.
Prezident İlham Əliyev bəyanatında vurğuladı ki, Azərbaycan etibarlı tərəfdaş kimi bütün öhdəliklərini vaxtında və yüksək səviyyədə yerinə yetirir. Bu isə Azərbaycanın beynəlxalq aləmdə nüfuzunu daha da artırır və Avropa ölkələri ilə münasibətlərin möhkəmlənməsinə mühüm töhfə verir. İtaliya şirkətlərinin Azərbaycanın müxtəlif sahələrində fəaliyyəti, sənaye və infrastruktur layihələrində iştirakı da iqtisadi əlaqələrin geniş miqyas aldığını nümayiş etdirir.
Mətbuata bəyanatda diqqət çəkən mühüm məqamlardan biri də nəqliyyat və logistika sahəsində əməkdaşlıq məsələləri oldu. Prezident İlham Əliyev Azərbaycanın iştirak etdiyi beynəlxalq nəqliyyat layihələrinin Avrasiya məkanında yeni iqtisadi imkanlar yaratdığını qeyd etdi. Şərq–Qərb və Şimal–Cənub nəqliyyat dəhlizlərinin inkişafı Azərbaycanın tranzit imkanlarını genişləndirir və İtaliya da bu prosesdə maraqlı tərəf kimi çıxış edir. Bu əməkdaşlıq Avropa ilə Asiya arasında iqtisadi əlaqələrin daha da güclənməsinə xidmət edir.
Humanitar və mədəni əlaqələr də Azərbaycan–İtaliya münasibətlərinin vacib istiqamətlərindəndir. Prezident İlham Əliyev iki xalq arasında qarşılıqlı hörmət və dostluq münasibətlərinin mövcud olduğunu bildirərək mədəniyyət, təhsil və elm sahələrində əməkdaşlığın inkişaf etdiyini diqqətə çatdırdı. Azərbaycanda İtaliya mədəniyyətinə göstərilən maraq, həmçinin İtaliyada Azərbaycan mədəniyyətinin təbliği xalqlarımız arasında yaxınlaşmanı daha da gücləndirir.
İtaliya Respublikası Nazirlər Şurasının sədri Ciorciya Meloninin Azərbaycana səfəri və keçirilən yüksək səviyyəli görüşlər bir daha təsdiq etdi ki, Azərbaycan–İtaliya münasibətləri möhkəm təməl üzərində qurulub və gələcəkdə daha da genişlənəcəkdir. Prezident İlham Əliyevin bəyanatında səsləndirdiyi fikirlər ölkələrimiz arasında strateji tərəfdaşlığın davamlı xarakter daşıdığını və bu əməkdaşlığın regional sabitlik, enerji təhlükəsizliyi və iqtisadi inkişaf baxımından mühüm əhəmiyyət kəsb etdiyini bir daha nümayiş etdirdi.
Bu gün Azərbaycan və İtaliya arasında formalaşmış münasibətlər qarşılıqlı etimadın, siyasi iradənin və ortaq maraqların uğurlu nəticəsi kimi qiymətləndirilir. Mövcud əməkdaşlıq modeli gələcək illərdə də yeni layihələrin reallaşdırılmasına, iqtisadi və siyasi əlaqələrin daha da möhkəmlənməsinə geniş imkanlar açır.
Ziya Vəliyev,
YAP Şəki rayon təşkilatının sədr müavini
