Qubadlı şəhəri tarixi torpaqlarımızdan biridir, qədim zamanlardan bəri bu ərazilərdə Azərbaycan xalqı məskunlaşıb və zəngin mədəniyyət, adət-ənənələr formalaşdırıb. 1993-cü il avqustun 31-də Ermənistan silahlı qüvvələri tərəfindən işğal edilən Qubadlı Vətən müharibəsi zamanı – 2020-ci il oktyabrın 25-də düşmən tapdağından azad edilib. Bu tarixi qələbə Qubadlı şəhərinin əhalisinə və bütün Azərbaycan xalqına böyük sevinc bəxş etdi.
İşğala qədər Qubadlı əhalisi əsasən, üzümçülük, taxılçılıq və heyvandarlıqla məşğul olurdu. Qubadlı şəhərinin azad olunmasından dərhal sonra burada genişmiqyaslı bərpa və yenidənqurma işləri aparılmağa başlanıb. Bu şəhərin iqtisadi inkişafı üçün böyük perspektivlər açılıb. Azərbaycan hökuməti və yerli təşkilatlar tərəfindən şəhərin infrastrukturu yenilənir, yeni yollar, məktəblər və sosial obyektlər inşa edilir. Məqsəd şəhərin əvvəlki iqtisadi və mədəni əhəmiyyətini bərpa etmək, əhalini yenidən Qubadlıya cəlb etməkdir.
Qubadlı şəhəri həm coğrafi mövqeyi, həm də tarixi baxımdan mühüm əhəmiyyətə malikdir və Azərbaycan dövləti bu bölgənin bərpasını prioritet hesab edir. Yenidənqurma işləri çərçivəsində şəhərdə infrastruktur layihələri həyata keçirilir, o cümlədən yolların, su, elektrik və qaz təchizatı sistemlərinin bərpası və müasirləşdirilməsi aparılır. Həmçinin, Qubadlıda yeni yaşayış binalarının tikintisi, məktəblərin, xəstəxanaların və digər sosial obyektlərin yaradılması planlaşdırılır. Bərpa prosesində “ağıllı şəhər” və “ağıllı kənd” konsepsiyalarının tətbiqi nəzərdə tutulub, bu da texnoloji həllərin və dayanıqlı inkişaf prinsiplərinin prioritet olacağını göstərir. Azərbaycan Prezidenti İlham Əliyev dəfələrlə Qubadlıya səfər edərək, burada gedən bərpa işləri ilə tanış olub və layihələrin icra müddətləri ilə bağlı məlumatlar alıb. Dövlətin əsas məqsədi şəhərin tamamilə bərpa edilməsi və sakinlərin geri qayıtması üçün uyğun şəraitin yaradılmasıdır.
Qubadlı şəhərinin yenidən qurulması layihələri, həmçinin xarici investisiyalar cəlb etmək və turizmi inkişaf etdirmək məqsədi güdür. Bu çərçivədə bölgənin zəngin təbiəti və tarixi-mədəni irsinin qorunub saxlanılması və gələcəkdə daha geniş miqyasda istifadəsi planlaşdırılır.
Azərbaycan Respublikasının Prezident İlham Əliyevin 31 iyul 2023-cü il tarixli Sərəncamı ilə 25 oktyabr – Qubadlı Şəhəri Günü kimi müəyyən edildi. Bu tarixin seçilməsi, şəhərin 2020-ci ildə azad edilməsi ilə əlaqədardır və Azərbaycan xalqı üçün böyük əhəmiyyət daşıyır. Qubadlı şəhərinin azad edilməsi, işğaldan azad olunan digər torpaqlar kimi, Azərbaycanın ərazi bütövlüyünün bərpası istiqamətində atılan vacib bir addım idi.
Qubadlı Şəhəri Günü həm də bu şəhərin əhalisi üçün bir bayramdır. Şəhərin azad edilməsi ilə burada yenidən həyat canlanmağa başladı və doğma yurda qayıdan insanlar bərpa-yenidənqurma işlərinə öz töhfələrini verməyə çalışırlar. Hər il bu əlamətdar gün münasibətilə Qubadlıda müxtəlif tədbirlər, mərasimlər keçirilir, şəhərin tarixi, mədəniyyəti və qəhrəmanlıq mübarizəsi yad edilir. Qubadlının işğaldan azad edilməsi uğrunda aparılmış döyüş əməliyyatlarında iştirak edən, igidlik və şücaətinə görə Azərbaycan Respublikası Silahlı Qüvvələrinin 15209 hərbi qulluqçusu Azərbaycan Respublikası Prezidentinin müvafiq sərəncamları ilə “Qubadlının azad olunmasına görə” medalı ilə təltif edildi. İşğaldan sonra Azərbaycan Respublikasının Prezidenti cənab İlham Əliyevin Qubadlıya ilk səfəri dekabrın 23-də oldu. Həmin gün Qubadlıda Azərbaycan Bayrağı ucaldıldı. Cənab Prezidentin Qubadlıya 2021-ci il oktyabrın 25-də səfəri zamanı Xanlıq-Qubadlı yolunun təməli qoyuldu, “Qubadlı” yarımstansiyasının açılış mərasimi oldu, 2023-cü il mayın 4-də Qubadlı şəhərində ilk yaşayış məhəlləsinin, inzibati binanın, 600 şagird yeri olan tam orta məktəbin, 91 çarpayılıq Mərkəzi Xəstəxananın, Xanlıq, Mahruzlu və Zilanlı kəndlərinin təməlqoyma mərasimləri keçirildi. Qubadlı yenidən qurulur, inkişaf edir. Qubadlı Şəhəri Günü bu inkişafın coşqusunda qeyd edilir.
Gülər Məmmədbəyli,
Xəzər rayonu, Ramiz Qasımov adına 216 nömrəli tam orta məktəbin müəllimi
