
Azərbaycanın müasir siyasi tarixində özünəməxsus yeri və mühüm rolu olan Yeni Azərbaycan Partiyasının yaranmasından 34 il ötür. Bu əlamətdar tarix yalnız bir siyasi təşkilatın fəaliyyətə başlamasının ildönümü deyil, həm də xalqın milli iradəsinin, dövlətçilik düşüncəsinin, sabitlik və inkişaf arzularının təcəssümüdür. Yeni Azərbaycan Partiyasının yaradılması Azərbaycanın mürəkkəb siyasi və ictimai proseslər yaşadığı, dövlət müstəqilliyinin ciddi təhlükələrlə üzləşdiyi bir dövrə təsadüf edir.
1992-ci il noyabrın 21-də Ümummilli Lider Heydər Əliyevin rəhbərliyi ilə Yeni Azərbaycan Partiyasının təsis edilməsi ölkənin siyasi həyatında mühüm dönüş nöqtəsi oldu. Həmin dövrdə xalqın böyük əksəriyyəti ölkəni böhrandan çıxara biləcək, milli maraqları qoruyacaq, müstəqil dövlətçiliyin möhkəmlənməsini təmin edəcək güclü siyasi liderə və təşkilata ehtiyac duyurdu. Belə bir şəraitdə Yeni Azərbaycan Partiyasının yaradılması xalqın gələcəyə olan ümidlərini və inamını özündə birləşdirdi.
Ümummilli Lider Heydər Əliyevin zəngin siyasi təcrübəsi, uzaqgörənliyi və dövlətçilik fəlsəfəsi partiyanın ideoloji əsaslarını formalaşdırdı. Yeni Azərbaycan Partiyası qısa müddət ərzində geniş ictimai dəstək qazanaraq ölkənin aparıcı siyasi qüvvəsinə çevrildi. Partiyanın əsas məqsədi müstəqil Azərbaycanın inkişafını təmin etmək, milli birliyi möhkəmləndirmək, demokratik dəyərləri inkişaf etdirmək və xalqın rifahına xidmət etmək idi.
Yeni Azərbaycan Partiyasının 34 illik fəaliyyəti Azərbaycanın siyasi, iqtisadi və ictimai həyatında baş verən mühüm dəyişikliklərlə sıx bağlıdır. Bu illər ərzində ölkəmiz dövlət quruculuğu, iqtisadi inkişaf, beynəlxalq münasibətlər və sosial rifah sahələrində böyük nailiyyətlər əldə edib. Müstəqil Azərbaycanın möhkəmlənməsi, beynəlxalq nüfuzunun artması və regional mövqelərinin güclənməsi bu inkişaf yolunun əsas göstəricilərindəndir.
Bu gün Yeni Azərbaycan Partiyasının fəaliyyəti Prezident İlham Əliyevin rəhbərliyi ilə yeni mərhələdə davam edir. Prezident İlham Əliyevin həyata keçirdiyi məqsədyönlü siyasət nəticəsində Azərbaycan güclü iqtisadi potensiala, müasir infrastruktura və geniş beynəlxalq əməkdaşlıq imkanlarına malik dövlətə çevrilib. Ölkəmizin əldə etdiyi tarixi nailiyyətlər, xüsusilə 2020-ci ildə Vətən müharibəsində qazanılan tarixi Zəfər Azərbaycan xalqının birliyinin, milli həmrəyliyinin və güclü dövlət iradəsinin təntənəsi oldu.
44 günlük Vətən müharibəsində əldə edilən Qələbə Azərbaycanın müasir tarixində yeni səhifə açdı. Uzun illər davam edən torpaq həsrətinə son qoyuldu, ölkəmizin ərazi bütövlüyü və suverenliyinin təmin olunması istiqamətində tarixi mərhələ formalaşdı. Bu gün işğaldan azad edilmiş ərazilərdə aparılan genişmiqyaslı bərpa və quruculuq işləri, Böyük Qayıdış proqramının həyata keçirilməsi Azərbaycanın inkişaf strategiyasının mühüm tərkib hissəsidir.
Partiyanın fəaliyyətində gənclərlə iş, onların ictimai-siyasi proseslərdə fəal iştirakının təmin edilməsi də xüsusi əhəmiyyət daşıyır. Gənc nəslin vətənpərvərlik ruhunda yetişməsi, milli-mənəvi dəyərlərə bağlılığı, dövlətçilik ənənələrinə hörmətlə yanaşması gələcək inkişafın əsas şərtlərindəndir. Yeni Azərbaycan Partiyası gənclərin təşəbbüslərinin dəstəklənməsi və onların ictimai həyatda fəallığının artırılması istiqamətində fəaliyyətini davam etdirir.
34 illik tarixi yol bir daha göstərir ki, Yeni Azərbaycan Partiyasının gücü onun xalqla birliyində, milli maraqlara sadiqliyində və dövlətçilik prinsiplərinə əsaslanan fəaliyyətindədir. Partiya yarandığı gündən etibarən Azərbaycanın müstəqilliyinin qorunması, siyasi sabitliyin təmin edilməsi və davamlı inkişafın dəstəklənməsi istiqamətində mühüm rol oynayıb.
Bu əlamətdar ildönümü münasibətilə Yeni Azərbaycan Partiyasının keçdiyi şərəfli yola nəzər salmaq, əldə olunan nailiyyətləri dəyərləndirmək və gələcək hədəfləri müəyyənləşdirmək xüsusi əhəmiyyət kəsb edir. Əminliklə demək olar ki, 34 illik siyasi fəaliyyət təcrübəsi partiyanın gələcək fəaliyyətinin də mühüm əsasını təşkil edir.
Yeni Azərbaycan Partiyasının yaranmasının 34-cü ildönümü münasibətilə bütün partiya üzvlərini və tərəfdarlarını təbrik edir, ölkəmizin tərəqqisi, dövlətçiliyimizin möhkəmlənməsi və xalqımızın rifahı naminə fəaliyyətlərində uğurlar arzulayırıq. Yeni Azərbaycan Partiyasının 34 illik tarixi müstəqil Azərbaycanın inkişaf salnaməsinin mühüm bir hissəsidir.
Səbinə İsgəndərli,
YAP Ağstafa rayon təşkilatının fəalı



