Aprelin 30-da Azərbaycan Respublikasının Prezidenti İlham Əliyev Albaniyanın paytaxtı Tirana şəhərində keçirilmiş Avropa çempionatında möhtəşəm uğur qazanaraq komanda hesabında birinci yeri qazanmış yunan-Roma, sərbəst və qadın güləşi üzrə milli komandaların üzvlərini və onların məşqçilərini qəbul edib. Dövlət başçısının bu görüşü Azərbaycan idmanının son illərdə qazandığı nailiyyətlərin yüksək səviyyədə qiymətləndirilməsi, eyni zamanda gələcək uğurlar üçün mühüm stimul kimi səciyyələnir.
Prezident İlham Əliyev çıxışında Azərbaycan güləşçilərinin Avropa çempionatında əldə etdiyi qələbəni böyük nailiyyət kimi dəyərləndirərək vurğulayıb ki, komanda hesabında birinci olmaq yalnız idman uğuru deyil, həm də ölkənin beynəlxalq nüfuzunun göstəricisidir. Qeyd olunub ki, müasir dövrdə güləş üzrə rəqabət daha da sərtləşib, müxtəlif ölkələrin güclü idmançıları yüksək nəticələr nümayiş etdirirlər. Belə bir şəraitdə Azərbaycan güləşçilərinin peşəkarlıq, iradə və qələbə əzmi nümayiş etdirərək rəqiblər üzərində üstünlük qazanması xüsusi əhəmiyyət kəsb edir.
Dövlət başçısı diqqətə çatdırıb ki, Azərbaycan güləş məktəbi zəngin ənənələrə malikdir və bu ənənələr bu gün də uğurla davam etdirilir. Təcrübəli idmançılarla yanaşı, gənc nəsil nümayəndələrinin də yüksək nəticələr göstərməsi ölkədə seleksiya və məşq prosesinin düzgün qurulduğunu təsdiqləyir. Bu kontekstdə federasiyanın fəaliyyəti, məşqçilərin əməyi və idmançıların zəhməti yüksək qiymətləndirilib.
Prezident İlham Əliyev çıxışında idmanın cəmiyyət həyatındakı roluna da toxunaraq qeyd edib ki, beynəlxalq yarışlarda Azərbaycanın dövlət bayrağının ucaldılması xalqda böyük qürur hissi yaradır. İdmançıların qazandığı qələbələr gənc nəslin vətənpərvərlik ruhunda tərbiyəsində mühüm rol oynayır və milli həmrəyliyin güclənməsinə xidmət edir. Bu baxımdan idmanın inkişafı dövlət siyasətinin prioritet istiqamətlərindən biri kimi daim diqqət mərkəzində saxlanılır.
Görüş zamanı federasiya rəhbərliyində və məşqçi korpusunda keçmiş tanınmış idmançıların təmsil olunmasının əhəmiyyətinə xüsusi diqqət yetirilib. Prezident qeyd edib ki, vaxtilə beynəlxalq arenalarda Azərbaycanı layiqincə təmsil etmiş idmançılar bu gün yeni nəslin yetişməsində mühüm rol oynayırlar. Bu, nəsillərarası varisliyin təmin olunması və idman ənənələrinin davam etdirilməsi baxımından mühüm amildir.
Dövlət başçısı vurğulayıb ki, ölkənin bütün bölgələrində yaradılmış müasir idman infrastrukturu, o cümlədən Olimpiya İdman kompleksləri gənclərin idmana cəlb olunmasına geniş imkanlar yaradır. Bu imkanlardan səmərəli istifadə olunması gələcək uğurların əsasını təşkil edir. Azərbaycan idmançılarının həm Olimpiya Oyunlarında, həm də dünya və Avropa çempionatlarında əldə etdiyi nəticələr ölkənin ümumi inkişafının bariz göstəricisidir.
Prezident İlham Əliyev çıxışında idmanda yalnız qələbələrin deyil, həm də məğlubiyyətlərin qaçılmaz olduğunu bildirərək əsas amilin idmançılarda güclü qələbə əzminin olması olduğunu qeyd edib. Bu əzmin ölkənin ümumi inkişaf dinamikası ilə uzlaşdığı və Azərbaycanı qalib dövlət kimi xarakterizə etdiyi diqqətə çatdırılıb.
Dövlət başçısı Azərbaycan Milli Olimpiya Komitəsinə uzun illər rəhbərlik etdiyini xatırladaraq bildirib ki, bu müddət ərzində idmanın inkişafı, yeni nəslin yetişməsi və uğurların davamlı xarakter alması onun diqqət mərkəzində olub. Bu gün də həmin siyasətin nəticələri özünü aydın şəkildə göstərir.
Çıxış zamanı ölkədə keçirilən beynəlxalq idman yarışlarının əhəmiyyətinə də toxunulub. Prezident qeyd edib ki, Azərbaycanın ev sahibliyi etdiyi mötəbər tədbirlər idman növlərinin populyarlaşmasına və ölkənin beynəlxalq imicinin möhkəmlənməsinə mühüm töhfə verir. Avropa Oyunları, İslam Həmrəyliyi Oyunları və digər yarışların yüksək səviyyədə təşkili Azərbaycanın böyük idman potensialını nümayiş etdirir.
Dövlət başçısı komandanın çoxmillətli tərkibini nəzərə alaraq rus dilində də çıxış edərək bütün idmançılara təşəkkürünü bildirib və onların beynəlxalq arenada Azərbaycanı layiqincə təmsil etdiklərini vurğulayıb. Xüsusilə qeyd olunub ki, həm yunan-Roma, həm sərbəst güləş üzrə birinciliklərin qazanılması tarixi əhəmiyyətə malikdir.
Qadın güləşçilərin də medalçılar sırasında yer alması xüsusi qeyd edilərək bu sahədə də inkişafın müşahidə olunduğu bildirilib.
Prezident İlham Əliyev bəzi hallarda beynəlxalq yarışlarda Azərbaycan idmançılarına qarşı ədalətsizliklərin müşahidə olunduğunu qeyd etsə də, belə vəziyyətlərdə belə ləyaqətli davranışın qorunmasının vacib olduğunu bildirib. İdmançıların həm xalça üzərində, həm də ondan kənarda ölkəni layiqincə təmsil etmələrinin əsas prinsip olduğu bildirilib.
Sonda dövlət başçısı idmançıları bir daha təbrik edərək onlara yeni-yeni qələbələr arzulayıb. Bu görüş bir daha göstərdi ki, Azərbaycanda idmanın inkişafı ardıcıl və məqsədyönlü siyasət nəticəsində təmin olunur və əldə edilən uğurlar gələcək nailiyyətlər üçün möhkəm zəmin yaradır.
Daşqın Mikayılov ,
YAP Şəki rayon təşkilatının sədri
