Prezident İlham Əliyevin qeyd etdiyi kimi, Naxçıvan Muxtar Respublikasında həyata keçirilən bütün nəhəng iqtisadi və sosial layihələrin əsas mənəvi sütunu milli kimliyimiz və mədəniyyətimizdir. Bu bölgənin çox zəngin tarixi, əsrlərə dayanan mədəniyyəti və xüsusilə də bənzərsiz memarlıq mədəniyyəti Azərbaycan xalqının fəxr mənbəyidir. Məhz bu səbəbdən dövlət başçısının Naxçıvana səfərlərində tarixi-mədəni abidələrin qorunması məsələsi hər zaman iqtisadi inkişaf qədər prioritet mövzu olaraq diqqət mərkəzində saxlanılır. Naxçıvan qədim Atabəylər dövlətinin paytaxtı olmuşdur və həmin dövrə aid abidələr bəşəriyyətin dünya əhəmiyyətli mədəni sərvətləri sırasında yer alır.
Tarixi irsin bərpasına dair görülən işlər çərçivəsində Prezident İlham Əliyevə Möminə xatun məqbərəsinin konservasiyası və bərpası barədə geniş məlumat təqdim edilmişdir. Azərbaycan dövləti milli memarlıq sənətinin korifeylərinə hər zaman yüksək qiymət vermişdir. Təsadüfi deyil ki, məşhur naxçıvanlı memar Əcəmi Naxçıvaninin şərəfinə xüsusi abidə ucaldılmış və bu abidə bilavasitə memarın ölməz əsəri olan Möminə xatun məqbərəsinin önündə yerləşir. Dövlət başçısı vurğulayır ki, digər tarixi-mədəni obyektlərin də qorunması və bərpası gələcək dövlət proqramlarında mütləq nəzərdə tutulur.
Qədim tarixi abidələrin bərpası yalnız mənəvi əhəmiyyət daşımır, o həmçinin muxtar respublikanın böyük turizm potensialının reallaşdırılması üçün əsas baza rolunu oynayır. Naxçıvanın gözəl təbiəti, təmiz havası və mənzərəli yerləri ilə yanaşı bu tarixi abidələr də turistlərin diqqətini cəlb edir. Lakin Prezident İlham Əliyev obyektiv şəkildə qeyd edir ki, əfsuslar olsun ki, bölgədə mehmanxanaların az olması və mövcud olanların bəzilərinin səviyyəsinin yetərli olmaması turizmin daha da sürətli inkişafını əngəlləyir. Bu maneənin aradan qaldırılması turizm strategiyasının əsas hədəflərindən biridir.
Mövcud problemi kökündən həll etmək məqsədilə dövlət başçısının iştirakı ilə Naxçıvan şəhərinin mərkəzində ən müasir standartlara cavab verən beşulduzlu yeni mehmanxananın təməli qoyulmuşdur. Təqribən 2028-ci ildə tam hazır olacaq bu mehmanxana daxili və xarici turistlərin yerləşmə problemini həll etməklə yanaşı, yeni iş yerlərinin açılmasına xidmət edəcəkdir. Prezident İlham Əliyevin qeyd etdiyi kimi, bütün bu sosial-iqtisadi irəliləyişlərin təməlində xalqımızın öz tarixinə, dilinə və mədəniyyətinə olan bağlılığı dayanır ki, bu da Azərbaycan xalqının xoşbəxtliyinin və yenilməzliyinin əsas rəhnidir.
Sevda Cabbarova,
YAP Nizami rayon təşkilatının “Babək prospekti, 75” ərazi partiya təşkilatının sədr müavini
