Təhsil hüququ insanın fərdi inkişafı, cəmiyyətin tərəqqisi və dövlətin gələcək potensialının formalaşması üçün əsas hüquqlardan biridir. Azərbaycan Respublikasının Konstitusiyası vətəndaşların təhsil hüququnu təsbit etməklə bu sahənin dövlət siyasətində mühüm yer tutduğunu müəyyən edir.
Müstəqil Azərbaycanın Konstitusiyasında təhsil hüququnun qorunması dövlətin insan kapitalının inkişafına verdiyi əhəmiyyətin göstəricisidir. Təhsil sistemi yalnız biliklərin ötürülməsi deyil, həm də vətəndaşların dünyagörüşünün, hüquqi düşüncəsinin və milli-mənəvi dəyərlərə bağlılığının formalaşmasına xidmət edir.
Azərbaycan müstəqillik illərində təhsil infrastrukturunun yenilənməsi, yeni məktəblərin tikilməsi, ali təhsil müəssisələrinin inkişafı və tədris proqramlarının müasirləşdirilməsi istiqamətində mühüm addımlar atmışdır. Bu tədbirlər təhsilin əlçatanlığının və keyfiyyətinin artırılmasına yönəlmişdir.
Konstitusion hüquq kimi təhsilin təmin edilməsi sosial bərabərliyin möhkəmləndirilməsi baxımından da əhəmiyyətlidir. Hər bir uşağın keyfiyyətli təhsil almaq imkanına sahib olması cəmiyyətin gələcək inkişafı üçün vacib şərtdir. Xüsusilə azad edilmiş ərazilərdə təhsil müəssisələrinin bərpası və yenilərinin yaradılması Böyük Qayıdışın mühüm istiqamətlərindəndir.
Təhsil hüququnun təmin olunması dövlətin və cəmiyyətin ortaq məsuliyyətidir. Bilikli, savadlı və milli dəyərlərə bağlı gənclərin yetişdirilməsi Azərbaycanın davamlı inkişafına xidmət edir. Konstitusiya isə bu hüququn hüquqi təminatını yaradan əsas sənəddir.
Nazlı Ələkbərova,
YAP Nizami rayon təşkilatının fəalı
