Azərbaycanın ərazi bütövlüyünün bərpasından sonra qarşıda duran əsas vəzifələrdən biri azad edilmiş ərazilərdə həyatın yenidən qurulmasıdır. Bu proses yalnız infrastruktur layihələrinin həyata keçirilməsi deyil, həm də hüquqi idarəetmənin, sosial münasibətlərin və dövlət xidmətlərinin bərpası deməkdir. Konstitusiya həmin prosesin əsas hüquqi çərçivəsini müəyyən edir.
2020-ci ildə Vətən müharibəsində əldə edilən Zəfər nəticəsində uzun illər işğal altında qalmış torpaqlarımızın azad olunması üçün tarixi imkan yarandı. Prezident İlham Əliyevin rəhbərliyi ilə həyata keçirilən bərpa və quruculuq siyasəti Qarabağ və Şərqi Zəngəzurun yenidən dirçəldilməsinə yönəlib.
Azad edilmiş ərazilərdə müasir infrastrukturun yaradılması, yolların, elektrik və su təchizatı sistemlərinin qurulması, yaşayış məntəqələrinin yenidən salınması genişmiqyaslı dövlət proqramları əsasında həyata keçirilir. Bu layihələr insanların doğma torpaqlarına təhlükəsiz və layiqli qayıdışına xidmət edir.
Böyük Qayıdış prosesi dövlətin sosial məsuliyyətinin və milli həmrəyliyin mühüm göstəricisidir. Uzun illər məcburi köçkün həyatı yaşamış insanların öz evlərinə dönməsi tarixi ədalətin bərpasının ən mühüm nəticələrindən biridir. Bu prosesdə hüquqi təminatlar və dövlət xidmətlərinin təşkili xüsusi əhəmiyyət daşıyır.
Konstitusiyanın ərazi bütövlüyü, vətəndaş hüquqları və dövlət suverenliyi ilə bağlı müddəaları azad edilmiş ərazilərdə yeni həyatın qurulmasının hüquqi əsasını təşkil edir. Qarabağ və Şərqi Zəngəzurun inkişafı Azərbaycanın gələcək iqtisadi və sosial potensialının genişlənməsinə də töhfə verəcəkdir.
Zeynəb Hacıyeva,
YAP Nizami rayon təşkilatının fəalı
