“İdeoloji təhlükəsizlik də fiziki təhlükəsizlik kimi önəmlidir”. Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin Yeni Azərbaycan Partiyasının VIII Qurultayında səsləndirdiyi bu fikir müasir dövrdə dövlət təhlükəsizliyinin yalnız sərhədlərin qorunması ilə məhdudlaşmadığını, milli düşüncənin, mənəvi dəyərlərin və cəmiyyətin informasiya mühitinin də qorunmasının vacibliyini göstərir.
2026-cı il oktyabrın 2-də keçirilən qurultayda cənab Prezident Azərbaycanın əldə etdiyi tarixi nailiyyətlərdən, qarşıda duran vəzifələrdən və ideoloji təxribatlara qarşı mübarizənin əhəmiyyətindən bəhs edib. Dövlət başçısının çıxışında təhsil və vətənpərvərlik ideoloji təhlükəsizliyin əsas dayaqları kimi önə çəkilib. Çünki savadlı, milli köklərinə bağlı və müstəqil düşünməyi bacaran cəmiyyət yalan məlumatların, yad təsirlərin və məqsədli təxribatların qarşısında daha güclü olur.
Bu baxımdan təhsil müəssisələrinin üzərinə xüsusi məsuliyyət düşür. Məktəb yalnız bilik verilən məkan deyil, eyni zamanda şəxsiyyətin formalaşdığı, dövlətə bağlılığın və milli-mənəvi dəyərlərə hörmətin aşılandığı mühüm ictimai institutdur. Təhsilalanların və təhsilverənlərin geyimi ilə bağlı məsələlər də məhz bu geniş kontekstdə, qanunvericiliyin tələbləri və dünyəvi təhsil prinsipləri çərçivəsində qiymətləndirilməlidir.
Təhsil müəssisələrində müəyyən edilmiş geyim qaydalarına riayət olunması tədris mühitində vahidliyin, nizam-intizamın və təhsil prosesinin tələblərinin qorunması baxımından əhəmiyyətlidir. Bununla yanaşı, belə məsələlər müzakirə edilərkən dünyəvilik anlayışının dini dəyərlərə düşmən münasibət kimi təqdim olunması doğru yanaşma deyil. Dünyəvi dövlətçilik prinsipləri ilə dini etiqada hörmət bir-birini inkar edən anlayışlar deyil. Burada əsas məsələ qanunun aliliyinin, insan hüquqlarına hörmətin və təhsil mühitinin məqsədlərinin qorunmasıdır.
Məhz bu məqamda Azərbaycanın dövlət-din münasibətlərinin mahiyyətinə diqqət yetirmək lazımdır. Ölkəmizdə İslam dini xalqımızın tarixi yaddaşının, mədəniyyətinin və mənəvi dünyasının mühüm tərkib hissəsidir. Dövlət tərəfindən dini-mədəni irsin qorunmasına, məscidlərin bərpasına və yeni ibadət məkanlarının yaradılmasına göstərilən diqqət milli-mənəvi dəyərlərə münasibətin mühüm göstəricisidir.
Xüsusilə işğaldan azad edilmiş ərazilərdə məscidlərin bərpası və yenidən qurulması həm dini irsin dirçəldilməsi, həm də tarixi yaddaşın qorunması baxımından böyük əhəmiyyət daşıyır. Uzun illər işğal altında qalmış ərazilərimizdə dini abidələrin yenidən həyata qaytarılması Böyük Qayıdışın yalnız fiziki quruculuqdan ibarət olmadığını, mənəvi və mədəni dirçəlişi də əhatə etdiyini nümayiş etdirir. Dini qurumlara və din xadimlərinə göstərilən dövlət qayğısı da bu siyasətin mühüm istiqamətlərindəndir.
Deməli, ideoloji təhlükəsizlik haqqında danışarkən Azərbaycanın İslam dininə münasibətini və milli-mənəvi dəyərlərin qorunması istiqamətində görülən işləri nəzərdən kənarda qoymaq olmaz. Eyni zamanda, dini dəyərlərə hörmət adı altında təhsil sahəsində müəyyən edilmiş hüquqi tələblərin əhəmiyyətini azaltmaq da düzgün deyil. Əsas məqsəd bu prinsiplər arasında qarşıdurma yaratmaq deyil, onların hər birini öz hüquqi və ictimai çərçivəsində düzgün anlamaqdır.
Nəticə etibarilə, dünyəvi təhsil, dini dəyərlərə hörmət və ideoloji təhlükəsizlik arasında sağlam tarazlığın qorunması Azərbaycanın gələcək inkişafı üçün mühüm əhəmiyyət daşıyır. Əsl ideoloji dayanıqlıq cəmiyyətdə süni qarşıdurmalar yaratmaqla deyil, həqiqətə, biliyə, qanuna və milli birliyə söykənməklə təmin olunur. Milli-mənəvi köklərimizə bağlı, dünyəvi dövlətçilik prinsiplərinə hörmət edən və müstəqil düşünən gəncliyin yetişdirilməsi Azərbaycanın gələcəyini qorumağın ən etibarlı yollarından biridir.
Tamerlan Qurbanov,
YAP Siyəzən Rayon Təşkilatının məsləhətçisi
