Naxçıvan Muxtar Respublikasının fasiləsiz və hərtərəfli inkişafı dövlət proqramlarının ardıcıl icrasına və düşünülmüş idarəetmə islahatlarına əsaslanır. Prezident İlham Əliyevin Sərəncamı ilə qəbul edilmiş Naxçıvanın inkişafına dair Dövlət Proqramı muxtar respublikanın iqtisadi və sosial həyatında yeni mərhələ açmışdır. Bu sənədlə yanaşı, bir neçə ay bundan əvvəl kənd təsərrüfatının inkişafına dair qəbul edilmiş Dövlət Proqramında da Naxçıvanın xüsusi yeri var. Dövlət başçısı bəyan etmişdir ki, bu məqsədlə lazımi maliyyə vəsaiti nəzərdə tutulmuşdur və suvarma layihələri fəal şəkildə icra edilməkdədir.
Naxçıvanda inkişafı sürətləndirmək məqsədilə dövlət büdcəsindən maliyyələşdiriləcək böyük maliyyətutumlu əlavə tədbirlər haqqında Sərəncamın imzalanacağı da açıqlanmışdır. Prezident İlham Əliyev vurğulayır ki, orada konkret layihələr göstəriləcək və işlərin sürətlə getməsi üçün lazımi dövlət nəzarəti tam təmin ediləcəkdir. Kənd təsərrüfatı sektorunda məhsuldarlığı artırmaq üçün bir çox artezian quyuları qazılacaq və bu gün suvarılmayan torpaqlara müasir sistemlər vasitəsilə su veriləcəkdir.
Bütün bu irimiqyaslı layihələrin uğurlu icrası idarəetmə sisteminin müasirləşdirilməsini tələb edir. Bu baxımdan, Qarabağ və Şərqi Zəngəzurda müsbət nəticələr vermiş yeni idarəetmə sistemi olan Prezidentin xüsusi nümayəndəliyi institutu Naxçıvanda da tətbiq olunmuşdur. Prezident İlham Əliyevin qeyd etdiyi kimi, kadr islahatları ilə paralel şəkildə həyata keçirilən bu struktur islahatları bölgənin inkişafı üçün əsas hədəfə istiqamətlənmiş bir yanaşmadır. Əminliklə bildirilmişdir ki, Naxçıvanda yaşayan 90 mindən çox insan yeni idarəetmənin üstünlüklərini artıq öz həyatlarında hiss edirlər.
Dövlətin Naxçıvana göstərdiyi bu xüsusi diqqət muxtar respublikanın Qarabağ və Şərqi Zəngəzurla birlikdə vahid bir məkana çevrilməsi ideyasına xidmət edir. Prezident İlham Əliyevin müəyyən etdiyi strategiyaya görə, inzibati cəhətdən birləşən bu üç bölgə vahid, nümunəvi bir inkişaf diyarı kimi formalaşdırılır. Naxçıvanın muxtar respublika statusu qorunub saxlanılmaqla təkmilləşdirilən idarəetmə qaydaları imkan verəcək ki, insanlar öz doğma yurdlarında daim təhlükəsizlik və firavanlıq şəraitində yaşasınlar.
Bahadur Məmmədov,
YAP Nizami rayon təşkilatının “Heydər Əliyev prospekti, 92a” ərazi partiya təşkilatının sədr müavini
