Böyük Qayıdış Qubadlının gələcəyinə yeni üfüqlər açır
İşğaldan azad edilmiş ərazilərin bərpası və keçmiş məcburi köçkünlərin doğma yurdlarına qayıdışının təmin olunması Azərbaycanın dövlət siyasətində mühüm yer tutur. Qubadlı şəhərinin azad edilməsi bu istiqamətdə tarixi dönüş yaratdı. Uzun illər yurd həsrəti çəkən sakinlər üçün doğma torpaqlarda yeni həyatın qurulması artıq konkret layihələr və dövlət proqramları vasitəsilə gerçəkləşir.
Prezident İlham Əliyevin rəhbərliyi ilə həyata keçirilən Böyük Qayıdış siyasəti azad edilmiş ərazilərin hərtərəfli inkişafını nəzərdə tutur. Məqsəd yalnız yaşayış evlərinin tikilməsi deyil, həm də müasir infrastrukturun yaradılması, məşğulluğun artırılması, təhsil və səhiyyə xidmətlərinin təşkili, iqtisadi fəallığın bərpasıdır. Qubadlıda aparılan layihələr bu genişmiqyaslı strategiyanın tərkib hissəsidir.
2023-cü il mayın 4-də Qubadlı şəhərində ilk yaşayış məhəlləsinin, inzibati binanın və 600 şagird yerlik tam orta məktəbin təməli qoyulub. Həmin səfər zamanı Xınalıq, Mahruzlu və Zilanlı kəndlərində də tikinti layihələrinə başlanılıb. Bu layihələr sakinlərin doğma torpaqlarda məskunlaşması və rayonun sosial həyatının bərpası üçün mühüm əhəmiyyət daşıyır.
Qubadlının iqtisadi potensialının inkişaf etdirilməsi də Böyük Qayıdışın əsas istiqamətlərindəndir. Rayonun kənd təsərrüfatı imkanlarından səmərəli istifadə edilməsi, turizm fəaliyyətinin genişləndirilməsi və yeni iş yerlərinin yaradılması əhalinin rifahının yüksəlməsinə kömək edə bilər. Yol və enerji infrastrukturunun qurulması bu sahələrin inkişafı üçün zəruri şərait yaradır.
Qubadlıda görülən işlər Azərbaycanın azad edilmiş əraziləri yenidən inkişaf etdirmək əzmini nümayiş etdirir. Prezident İlham Əliyevin rəhbərliyi ilə həyata keçirilən layihələr doğma yurda qayıdışı yalnız fiziki məskunlaşma deyil, həm də iqtisadi və sosial həyata yenidən inteqrasiya prosesi kimi formalaşdırır. Böyük Qayıdış Qubadlının gələcəyini müəyyənləşdirən strateji hədəfdir.
Tofiqə Qurbanova,
YAP Nizami rayon təşkilatının “Məmmədəli Şərifli küçəsi, 24/12” ərazi partiya təşkilatının sədr müavini
