Azərbaycan Respublikası ilə Ukrayna arasında münasibətlər müstəqillik dövründən etibarən ardıcıl şəkildə inkişaf etmiş, strateji tərəfdaşlıq səviyyəsinə yüksəlmişdir. Bu əlaqələrin əsasını qarşılıqlı hörmət, suverenlik və ərazi bütövlüyünün dəstəklənməsi prinsipləri təşkil edir. Prezident İlham Əliyevin 2026-cı ilin 25 aprelində Prezident Volodimir Zelenski ilə Bakıda keçirdiyi görüş bu münasibətlərin dinamikliyini və çoxşaxəli xarakterini bir daha təsdiqləmişdir.
Azərbaycan–Ukrayna münasibətlərinin siyasi təməli 2008-ci ildə Kiyevdə, 2011-ci ildə isə Bakıda imzalanmış strateji tərəfdaşlıq sənədləri ilə möhkəmləndirilmişdir. Bu sənədlərdə ölkələrin suverenliyi, ərazi bütövlüyü və sərhədlərin toxunulmazlığına dair qarşılıqlı öhdəliklər öz əksini tapmışdır. Prezidentlərin son dörd ildə yeddi dəfə görüşməsi, o cümlədən beynəlxalq təşkilatların toplantıları çərçivəsində müntəzəm dialoqlar aparması, ikitərəfli münasibətlərin davamlılığını göstərir. Münxen, Kiyev və Bakı görüşləri bu əməkdaşlığın ardıcıllığını sübut edir.
İqtisadi əlaqələrdə enerji sektoru xüsusi yer tutur. SOCAR uzun illərdir Ukraynada uğurla fəaliyyət göstərir və bu sahədə yeni birgə layihələrin reallaşdırılması perspektivləri mövcuddur. Ticarət dövriyyəsi artıq yarım milyard ABŞ dollarını ötüb və tərəflər bu göstəricini daha da artırmaq niyyətindədirlər. Enerji, sərmayə qoyuluşu və yeni təşəbbüslər gündəliyin əsas mövzuları olmuşdur.
Azərbaycan və Ukrayna hərbi sənaye komplekslərinin inkişafı fonunda hərbi-texniki əməkdaşlıq xüsusi əhəmiyyət kəsb edir. Birgə istehsal imkanları, müdafiə sənayesində texnoloji mübadilə və sənaye sahəsində əməkdaşlıq perspektivləri müzakirə olunmuşdur. Bu, iki ölkənin təhlükəsizlik maraqlarının uzlaşdırılmasına və müdafiə qabiliyyətlərinin gücləndirilməsinə xidmət edir.
Son illərdə Xarici İşlər Nazirlikləri arasında məsləhətləşmələrin və Hökumətlərarası Komissiyanın iclaslarının keçirilməsi ikitərəfli münasibətlərin institusional əsaslarını möhkəmləndirmişdir. Bu tədbirlərin növbəti mərhələdə Ukraynada təşkil olunması planlaşdırılır ki, bu da əməkdaşlığın balanslı şəkildə davam etdirilməsinə şərait yaradır.
Azərbaycan–Ukrayna münasibətləri yalnız siyasi dialoqla məhdudlaşmır, həm də iqtisadi, enerji, hərbi-texniki və diplomatik sahələri əhatə edir. Prezident İlham Əliyev və Prezident Volodimir Zelenski arasında keçirilən son görüş bu əlaqələrin strateji xarakterini bir daha təsdiqləmişdir. Qarşılıqlı hörmət, suverenlik və ərazi bütövlüyünün dəstəklənməsi prinsiplərinə əsaslanan bu münasibətlər gələcəkdə daha da dərinləşəcək və regional sabitlik, beynəlxalq əməkdaşlıq üçün mühüm töhfə verəcəkdir.
Bakı Slavyan Universitetinin tələbəsi Səfərzadə Məryəmxanım Hüseyn qızı
