Hər bir xalqın gücü onun milli birliyində, dövlətçiliyində və Vətənini qorumağa qadir olan ordusundadır. Azərbaycan xalqı da əsrlər boyu öz torpağını, milli dəyərlərini və dövlətçilik ənənələrini qorumaq əzmi ilə yaşamışdır. Bu əzmin ən mühüm təcəssümü isə bu gün regionun ən qüdrətli hərbi qüvvələrindən biri hesab olunan Azərbaycan Ordusudur.
Azərbaycan milli ordusunun tarixi XX əsrin əvvəllərinə gedib çıxır. 1918-ci ildə Azərbaycan Xalq Cümhuriyyətinin rəhbərləri yaxşı anlayırdılar ki, müstəqilliyi əldə etmək qədər onu qorumaq da vacibdir. Məhz buna görə milli hərbi hissələrin yaradılması dövlət quruculuğunun əsas istiqamətlərindən biri kimi müəyyənləşdirilmişdi. O dövrdə əsası qoyulan ordu ənənələri sonrakı nəsillər üçün mühüm irsə çevrildi.
Müstəqilliyin bərpasından sonra Azərbaycan yeni çağırışlarla üzləşdi. Qarşıda duran ən mühüm məsələlərdən biri müasir tələblərə cavab verən, peşəkar və güclü Silahlı Qüvvələrin formalaşdırılması idi. Bu istiqamətdə həyata keçirilən ardıcıl siyasət nəticəsində Azərbaycan Ordusu qısa müddətdə böyük inkişaf yolu keçdi.
Ordunun qüdrəti yalnız silahların sayı ilə müəyyən edilmir. Hərbi güc ilk növbədə yüksək hazırlıqlı şəxsi heyət, düzgün idarəetmə sistemi, vətən sevgisi və qələbəyə inam deməkdir. Azərbaycan hərbçisi məhz bu keyfiyyətləri özündə birləşdirən peşəkar döyüşçü kimi formalaşıb. Müasir hərbi biliklərə yiyələnən, ən yeni texnologiyalardan istifadə edən zabit və əsgərlərimiz ölkəmizin təhlükəsizliyinin etibarlı təminatçılarıdır.
Son illərdə Azərbaycanın hərbi sahədə əldə etdiyi nailiyyətlər beynəlxalq səviyyədə də yüksək qiymətləndirilir. Ordumuzun döyüş hazırlığı, çevik idarəetmə qabiliyyəti və müasir texniki imkanları onun gücünü daha da artırıb. Dövlət tərəfindən hərbi sahəyə göstərilən diqqət nəticəsində Silahlı Qüvvələrimizin maddi bazası əhəmiyyətli dərəcədə möhkəmlənib.
Azərbaycan əsgərinin gücü təkcə silahında deyil, onun mənəvi dünyasında da öz əksini tapır. Vətənə bağlılıq, dövlətə sədaqət və milli qürur hissi hər bir hərbçinin fəaliyyətinin əsasını təşkil edir. Məhz bu amillər ordumuzun yüksək döyüş ruhunu formalaşdırır və onu daha güclü edir.
Tarix sübut etdi ki, güclü ordu dövlət müstəqilliyinin əsas təminatçısıdır. Azərbaycan xalqı da bunu yaxşı bilir və öz ordusunu daim dəstəkləyir. Xalqın etimadı və sevgisi hərbçilərimiz üçün böyük mənəvi dayaqdır. Bu həmrəylik ölkəmizin əldə etdiyi uğurların əsas səbəblərindən biridir.
Bu gün Azərbaycan Ordusu yeni inkişaf mərhələsini yaşayır. Müasir hərbi texnologiyalar, peşəkar kadr hazırlığı və döyüş təcrübəsi Silahlı Qüvvələrimizin imkanlarını daha da genişləndirir. Qarşıya qoyulan vəzifələrin uğurla yerinə yetirilməsi ordumuzun gələcəkdə də öz qüdrətini qoruyub saxlayacağını göstərir.
26 İyun – Silahlı Qüvvələr Günü münasibətilə Azərbaycan Ordusunun bütün şəxsi heyətinə, veteranlara, qazilərə və Vətən uğrunda canından keçmiş şəhidlərimizin ailələrinə dərin ehtiramımızı bildiririk. Əminik ki, Azərbaycan əsgəri bundan sonra da dövlətimizin təhlükəsizliyini layiqincə qoruyacaq, üçrəngli bayrağımızın daim yüksəklərdə dalğalanmasını təmin edəcəkdir.
Qüdrətli ordu, güclü dövlət və sarsılmaz xalq birliyi Azərbaycanın gələcəyinin ən möhkəm təməlidir.
Zümrüd Əliyeva,
YAP Xətai rayon təşkilatının fəalı
