8 Noyabr – Zəfər Günü Azərbaycan xalqının müasir tarixində xüsusi əhəmiyyətə malik olan, milli birliyimizi, dövlətimizin gücünü və Ordumuzun qəhrəmanlığını təcəssüm etdirən möhtəşəm bir gündür. 2020-ci ildə 44 gün davam edən Vətən müharibəsi Azərbaycanın ərazi bütövlüyünün bərpası istiqamətində tarixi mərhələ oldu.
Müzəffər Azərbaycan Ordusunun döyüş meydanında göstərdiyi şücaət, əsgər və zabitlərimizin fədakarlığı, xalqımızın həmrəyliyi və dövlətimizin qətiyyətli mövqeyi bu Zəfərin əldə olunmasında mühüm rol oynadı. Noyabrın 8-də Şuşa şəhərinin işğaldan azad edilməsi müharibənin taleyinə həlledici təsir göstərən tarixi hadisə oldu.
Zəfər Günü yalnız hərbi qələbənin deyil, həm də milli iradənin, vətənpərvərliyin və tarixi ədalətin rəmzidir. Bu gün Azərbaycan xalqı öz qəhrəman övladlarının fədakarlığını böyük ehtiramla xatırlayır, Vətən uğrunda canlarından keçmiş şəhidlərimizin əziz xatirəsini ehtiramla yad edir. Qazilərimizin göstərdiyi igidlik və fədakarlıq isə gələcək nəsillər üçün örnəkdir.
Bu tarixi Zəfər Azərbaycanın beynəlxalq mövqeyinin möhkəmlənməsinə, işğaldan azad edilmiş ərazilərdə genişmiqyaslı bərpa və quruculuq işlərinin aparılmasına, Böyük Qayıdış prosesinin həyata keçirilməsinə yeni imkanlar yaratdı.
8 Noyabr xalqımızın yaddaşında qürur, birlik və qalibiyyət günü kimi əbədi yaşayacaqdır. Bu Zəfər Azərbaycan dövlətçiliyinin tarixində yeni səhifə açdı və Vətən sevgisinin ən parlaq nümunələrindən birinə çevrildi.
Zəfərimiz əbədi, dövlətimiz qüdrətli, Azərbaycanımız daim müstəqil və bütöv olsun! Şəhidlərimizin əziz xatirəsi daim qəlbimizdə yaşayacaqdır. Qarabağ Azərbaycandır!
İsgəndər Yusifli,
YAP Yasamal rayon təşkilatının fəal gənci
