8 Noyabr Azərbaycan xalqının yaddaşına əbədi həkk olunmuş, milli qürur və iftixar hissi doğuran möhtəşəm tarixdir. Bu gün xalqımızın uzun illər davam edən torpaq həsrətinə son qoyulmasının, tarixi ədalətin bərpasının və dövlətimizin ərazi bütövlüyü uğrunda apardığı mübarizənin parlaq nəticəsinin təcəssümüdür. Zəfər Günü Azərbaycan xalqının iradəsinin, birliyinin, əzmkarlığının və sarsılmaz vətənpərvərlik ruhunun təntənəsidir.
Azərbaycan xalqı uzun illər Ermənistanın işğalçılıq siyasəti nəticəsində ağır faciələrlə üzləşmiş, bir milyondan çox soydaşımız qaçqın və məcburi köçkün həyatına məhkum edilmişdir. Şəhər və kəndlərimiz dağıdılmış, tarixi və mədəni irsimizə ciddi ziyan vurulmuş, minlərlə ailənin doğma yurdlarına qayıtmaq arzusu uzun illər gerçəkləşməmişdir. Buna baxmayaraq, Azərbaycan xalqı öz torpaqlarını heç vaxt unutmadı, tarixi ədalətin bərpa olunacağına inamını itirmədi.
Ümummilli Lider Heydər Əliyevin müəyyən etdiyi dövlətçilik strategiyasının Prezident İlham Əliyev tərəfindən uğurla davam etdirilməsi Azərbaycanın güclənməsində, beynəlxalq mövqelərinin möhkəmlənməsində və milli maraqlarının qorunmasında mühüm rol oynadı. Dövlət başçısının həyata keçirdiyi məqsədyönlü siyasət nəticəsində ölkəmiz iqtisadi, siyasi və hərbi baxımdan böyük inkişaf yolu keçdi. Güclü iqtisadiyyatın formalaşdırılması, müasir hərbi sənaye kompleksinin yaradılması, Silahlı Qüvvələrin maddi-texniki bazasının möhkəmləndirilməsi və peşəkar hərbi kadrların hazırlanması tarixi Zəfərə aparan mühüm amillər oldu.
Prezident İlham Əliyevin rəhbərliyi ilə həyata keçirilən ordu quruculuğu siyasəti Azərbaycan Ordusunu regionun ən güclü və müasir ordularından birinə çevirdi. Ölkəmizin müdafiə qabiliyyətinin artırılması, hərbi texnologiyaların tətbiqi və beynəlxalq təcrübənin öyrənilməsi gələcək qələbənin əsasını təşkil etdi. Dövlət başçısının qeyd etdiyi kimi, Prezident kimi 2003-cü ildən etibarən atılan bütün addımlar Azərbaycanın gücləndirilməsinə, torpaqlarımızın işğaldan azad olunmasına xidmət edirdi.
2020-ci il sentyabrın 27-də Ermənistan silahlı qüvvələrinin genişmiqyaslı təxribatlarına cavab olaraq Azərbaycan Ordusu əks-hücum əməliyyatına başladı. Beləliklə, Vətən müharibəsi başlandı. 44 gün davam edən müharibə Azərbaycan xalqının tarixi iradəsini və Silahlı Qüvvələrimizin döyüş qabiliyyətini bütün dünyaya nümayiş etdirdi. Ali Baş Komandan İlham Əliyevin qətiyyətli rəhbərliyi, Azərbaycan əsgər və zabitlərinin qəhrəmanlığı, xalqımızın dövlət başçısı ətrafında sıx birliyi qələbənin təmin olunmasında həlledici rol oynadı.
Vətən müharibəsi dövründə Azərbaycan Ordusu hər gün irəliləyərək bir sıra şəhər, qəsəbə və kəndlərimizi işğaldan azad etdi. Cəbrayıl, Füzuli, Zəngilan, Qubadlı və digər yaşayış məntəqələrinin azad olunması xalqımızın qələbəyə olan inamını daha da artırdı. Noyabrın 8-də isə qədim mədəniyyət beşiyimiz olan Şuşa şəhərinin azad edilməsi müharibənin taleyini həll edən tarixi hadisəyə çevrildi. Şuşanın azad olunması Azərbaycan xalqının qəhrəmanlıq salnaməsinə qızıl hərflərlə yazıldı.
Azərbaycan Respublikasının Prezidenti, Müzəffər Ali Baş Komandan İlham Əliyevin 2020-ci il noyabrın 8-də xalqa müraciətində səsləndirdiyi “Əziz Şuşa, sən azadsan!” sözləri xalqımızın yaddaşında əbədi yaşayacaq. Bu müjdə yalnız bir şəhərin azad edilməsi deyil, milli qürurumuzun, tarixi yaddaşımızın və mənəvi dəyərlərimizin bərpası demək idi. Şuşanın azad olunması ilə Azərbaycan Ordusunun gücü, əsgərlərimizin cəsarəti və xalqımızın yenilməz ruhu bir daha təsdiq olundu.
Noyabrın 10-da imzalanmış üçtərəfli bəyanat Ermənistanın kapitulyasiyasını rəsmiləşdirdi və hərbi əməliyyatların dayandırılması ilə nəticələndi. Azərbaycan öz hərbi-siyasi üstünlüyünü təmin edərək ərazilərinin böyük hissəsini işğaldan azad etdi. Bu Qələbə beynəlxalq hüququn norma və prinsiplərinə, BMT Təhlükəsizlik Şurasının müvafiq qətnamələrinə əsaslanan Azərbaycanın haqlı mövqeyinin təntənəsi oldu.
Vətən müharibəsi, eyni zamanda, XXI əsrin müharibə aparılması təcrübəsinə mühüm yeniliklər gətirdi. Azərbaycan Ordusunun müasir texnologiyalardan, pilotsuz uçuş aparatlarından və çevik hərbi idarəetmə imkanlarından istifadə etməsi dünya hərbi ekspertlərinin diqqətini cəlb etdi. Ordumuzun qazandığı təcrübə Azərbaycanın hərbi qüdrətini və müdafiə strategiyasının effektivliyini nümayiş etdirdi.
2020-ci ildə əldə edilən Zəfər ölkəmizdə milli həmrəyliyi və birliyi daha da gücləndirdi. Müharibə dövründə siyasi baxışlarından, sosial vəziyyətindən və yaşadığı bölgədən asılı olmayaraq, bütün Azərbaycan xalqı vahid məqsəd ətrafında birləşdi. Dövlət başçısının ətrafında formalaşan milli birlik xalqımızın ən böyük mənəvi gücünə çevrildi. Bu birlik bir daha göstərdi ki, Azərbaycanın gücü onun xalqının həmrəyliyində, dövlətinə və Vətəninə bağlılığındadır.
2023-cü il sentyabrın 19-20-də həyata keçirilən lokal xarakterli antiterror tədbirləri nəticəsində Azərbaycanın suverenliyi ölkənin bütün ərazisində tam təmin edildi. Bununla da dövlətimizin konstitusiya quruluşu və ərazi bütövlüyü tam bərpa olundu. Bu hadisə Azərbaycan tarixində yeni mərhələnin başlanğıcı olmaqla yanaşı, ölkəmizin suveren hüquqlarının təmin edilməsinin mühüm göstəricisinə çevrildi.
Zəfər yalnız hərbi qələbə ilə məhdudlaşmır. Bu tarixi hadisə Azərbaycanın qarşısında geniş quruculuq və inkişaf imkanları açdı. İşğaldan azad edilmiş ərazilərdə genişmiqyaslı bərpa və yenidənqurma işlərinə başlanıldı. Qarabağ və Şərqi Zəngəzurda yollar, tunellər, hava limanları, elektrik stansiyaları, yaşayış kompleksləri və sosial infrastruktur obyektləri inşa edilir. Böyük Qayıdış proqramı çərçivəsində keçmiş məcburi köçkünlərin doğma torpaqlarına qayıdışı təmin olunur. Bir zamanlar viran qoyulmuş yurdlarımızda yenidən həyat canlanır, yeni müəssisələr yaradılır, kənd təsərrüfatı və turizm potensialı inkişaf etdirilir.
Zəfər Günü həm də şəhidlərimizin əziz xatirəsinə ehtiram, qazilərimizin qəhrəmanlığına minnətdarlıq günüdür. Vətənimizin azadlığı və suverenliyi uğrunda canlarından keçən qəhrəmanlarımızın fədakarlığı heç vaxt unudulmayacaq. Şəhid ailələrinin və müharibə əlillərinin sosial müdafiəsinin gücləndirilməsi, onların qayğı və problemlərinin diqqətdə saxlanılması dövlət siyasətinin mühüm istiqamətlərindəndir. Şəhidlərimizin bizə miras qoyduğu müqəddəs Vətən sevgisi gələcək nəsillər üçün əbədi örnəkdir.
Bu gün Azərbaycanın əsas hədəflərindən biri əldə edilmiş tarixi Zəfərin siyasi, iqtisadi və diplomatik müstəvidə möhkəmləndirilməsi, regionda davamlı sülhün və təhlükəsizliyin təmin olunmasıdır. Azərbaycan sülh tərəfdarı olduğunu dəfələrlə bəyan etmiş, münasibətlərin beynəlxalq hüquq normaları və qarşılıqlı hörmət əsasında qurulmasının vacibliyini vurğulamışdır. Ölkəmizin artan beynəlxalq nüfuzu, iqtisadi imkanları və hərbi qüdrəti gələcək inkişafımız üçün möhkəm zəmin yaradır.
8 Noyabr – Zəfər Günü Azərbaycan xalqının tarixində yalnız bir qələbə tarixi deyil, həm də milli iradənin, dövlətçilik əzminin və sarsılmaz birliyin rəmzidir. Bu şanlı tarix gələcək nəsillərə ötürüləcək ən böyük mənəvi miraslarımızdan biridir. Azərbaycan xalqı Müzəffər Ali Baş Komandan İlham Əliyevin rəhbərliyi ilə qazandığı bu tarixi Qələbə ilə haqlı olaraq fəxr edir.
Eldar Əsədov,
YAP Tərtər rayon təşkilatının sədri
