Tarixi Zəfərdən böyük qayıdışa

20 Oktyabr Azərbaycan tarixində mühüm əhəmiyyətə malik günlərdən biridir. Bu tarix Zəngilan şəhərinin işğaldan azad olunması ilə yadda qalmış, xalqımızın Vətən sevgisinin, birliyinin və qələbə əzminin təcəssümünə çevrilmişdir. Hər il oktyabrın 20-də qeyd olunan Zəngilan Şəhəri Günü Azərbaycanın şanlı Zəfər tarixini xatırlamaq, qəhrəmanlarımızın fədakarlığını yad etmək və azad torpaqlarımızda həyata keçirilən quruculuq işlərini qiymətləndirmək baxımından xüsusi əhəmiyyət daşıyır.

Zəngilan rayonu 1993-cü il oktyabrın 29-da Ermənistan silahlı qüvvələri tərəfindən işğal edilmişdi. Uzun illər doğma yurdlarından didərgin düşmüş zəngilanlılar öz torpaqlarına qayıdacaqları günü səbirsizliklə gözləyirdilər. 2020-ci il sentyabrın 27-də başlayan Vətən müharibəsi xalqımızın tarixi ədalətin bərpası uğrunda apardığı mübarizənin həlledici mərhələsi oldu.

Azərbaycan Ordusunun rəşadəti və Ali Baş Komandan İlham Əliyevin rəhbərliyi ilə həyata keçirilən hərbi əməliyyatlar nəticəsində 2020-ci il oktyabrın 20-də Zəngilan şəhəri işğaldan azad edildi. Bu qələbə Azərbaycanın ərazi bütövlüyünün bərpası istiqamətində mühüm addımlardan biri olmaqla yanaşı, illərlə yurd həsrəti çəkən insanların qəlbində böyük sevinc və ümid yaratdı.

Zəngilanın azad olunması yalnız hərbi qələbə deyil, həm də milli iradənin, dövlətçilik əzminin və xalq-ordu birliyinin təntənəsi idi. Bu tarixi hadisə Azərbaycanın gücünü, əzmini və öz torpaqlarına sahib çıxmaq qətiyyətini bir daha bütün dünyaya nümayiş etdirdi. Zəngilan uğrunda döyüşlərdə iştirak edən hərbçilərimizin qəhrəmanlığı və şəhidlərimizin fədakarlığı xalqımızın yaddaşında daim yaşayacaqdır.

Bu gün Zəngilan azad edilmiş ərazilərimizdə həyata keçirilən genişmiqyaslı bərpa və yenidənqurma işlərinin mühüm mərkəzlərindən biridir. Şəhərdə müasir infrastrukturun yaradılması, yaşayış məntəqələrinin bərpası, yolların çəkilməsi, sosial obyektlərin inşası və iqtisadi imkanların genişləndirilməsi istiqamətində mühüm tədbirlər həyata keçirilir. Məqsəd doğma torpaqlarından didərgin düşmüş insanların təhlükəsiz, rahat və layiqli həyat şəraitində öz yurdlarına qayıtmalarını təmin etməkdir.

Zəngilanın inkişafında nəqliyyat və logistika imkanlarının genişləndirilməsi də xüsusi yer tutur. Bölgənin strateji mövqeyi, təbii sərvətləri və iqtisadi potensialı onun gələcək inkişafı üçün mühüm imkanlar yaradır. Ağıllı kənd konsepsiyası əsasında həyata keçirilən layihələr isə müasir texnologiyaların tətbiqi, dayanıqlı yaşayış mühitinin formalaşdırılması və kənd təsərrüfatının inkişafı baxımından əhəmiyyətlidir.

Zəngilan həm də zəngin təbiəti, tarixi-mədəni irsi və milli-mənəvi dəyərləri ilə seçilən qədim Azərbaycan torpağıdır. Onun yenidən dirçəldilməsi yalnız yaşayış məntəqələrinin bərpası deyil, həm də tarixi yaddaşın qorunması, mədəni irsin yaşadılması və gələcək nəsillərə ötürülməsi deməkdir.

20 Oktyabr – Zəngilan Şəhəri Günü hər bir azərbaycanlı üçün qürur və iftixar mənbəyidir. Bu əlamətdar tarix bizə azadlığın hansı fədakarlıqlar hesabına qazanıldığını xatırladır, Vətənə bağlılığın və milli birliyin əhəmiyyətini bir daha ön plana çəkir. Zəngilanın azadlığı ilə başlayan yeni mərhələ bu gün quruculuq, inkişaf və Böyük Qayıdış prosesi ilə davam edir.

Yunis Eyyubov,
YAP Ağstafa rayon təşkilatının əməkdaşı