Azərbaycan xalqının tarixində elə günlər var ki, onlar zaman keçdikcə öz əhəmiyyətini daha da artırır, milli yaddaşımızın ayrılmaz hissəsinə çevrilir. 17 Oktyabr – Füzuli şəhəri günü də belə əlamətdar tarixlərdən biridir. Bu gün xalqımızın qəhrəmanlığını, əzmini, birliyini və doğma torpaqlara olan sonsuz sevgisini özündə əks etdirir.
Füzuli şəhəri Azərbaycanın qədim yaşayış məskənlərindən biri olmaqla yanaşı, zəngin tarixi, mədəniyyəti və mənəvi dəyərləri ilə seçilir. Bu torpaqda yaşayan insanlar öz zəhmətsevərliyi, qonaqpərvərliyi və Vətənə bağlılığı ilə tanınıblar. Lakin 1993-cü il avqustun 23-də Füzulinin işğal olunması şəhərin həyatında ağır bir dövrün başlanğıcı oldu. Minlərlə insan doğma evindən, el-obasından ayrı düşdü. İllərlə davam edən həsrət və nisgil füzulililərin qəlbində dərin izlər buraxdı.
Bununla belə, xalqımız doğma torpaqların azad olunacağına inamını heç vaxt itirmədi. Azərbaycan dövləti ərazi bütövlüyünün bərpasını əsas məqsədlərindən biri kimi müəyyənləşdirdi. Güclü ordu quruculuğu, milli həmrəylik və xalqın sarsılmaz iradəsi bu məqsədə doğru atılan addımların əsasını təşkil etdi.
2020-ci il sentyabrın 27-də başlayan Vətən müharibəsi Azərbaycan tarixinin ən şanlı səhifələrindən birini yazdı. Azərbaycan Ordusu böyük qəhrəmanlıq və peşəkarlıq nümayiş etdirərək torpaqlarımızı işğaldan azad etməyə başladı. Oktyabrın 17-də Füzuli şəhərinin azad edilməsi xalqımızın yaddaşında əbədi yaşayacaq tarixi hadisəyə çevrildi. Bu qələbə uzun illər doğma yurd həsrəti ilə yaşayan insanların qəlbində sevinc və ümid işığı yandırdı.
Füzulinin azadlığı uğrunda mübarizə aparan Azərbaycan əsgərlərinin şücaəti, şəhidlərimizin fədakarlığı və qazilərimizin qəhrəmanlığı heç vaxt unudulmayacaq. Onlar öz canları və sağlamlıqları bahasına xalqımıza böyük sevinc yaşatdılar. Bu gün azad Füzulidə dalğalanan Azərbaycan bayrağı həmin qəhrəmanlığın, milli birliyin və dövlətimizin gücünün rəmzidir.
Füzulinin azad olunması ilə qarşıda yeni bir mərhələ – bərpa və quruculuq dövrü başladı. Uzun illər dağıntılara məruz qalmış şəhərdə genişmiqyaslı yenidənqurma işləri həyata keçirilir. Müasir yollar, yaşayış binaları, məktəblər, sosial obyektlər və digər infrastruktur layihələri şəhərin gələcək inkişafına xidmət edir. Füzuli Beynəlxalq Hava Limanının istifadəyə verilməsi də regionun nəqliyyat imkanlarının genişləndirilməsi baxımından mühüm addım oldu.
Bu gün Füzulinin siması dəyişir, şəhər yeni inkişaf mərhələsinə qədəm qoyur. Ən böyük sevinc isə doğma yurdlarından didərgin düşmüş insanların geri qayıtması, öz evlərində yenidən məskunlaşmasıdır. Böyük Qayıdış prosesi yalnız insanların yaşayış yerlərinə qayıtması deyil, həm də illərlə ayrılıq yaşayan ailələrin birləşməsi, milli-mənəvi dəyərlərin yaşadılması və həyatın yenidən canlanması deməkdir.
Füzulinin dirçəlişi Azərbaycanın gələcəyə inamla baxdığını, azad edilmiş torpaqlarda dayanıqlı inkişaf və firavan həyat qurmaq əzmində olduğunu göstərir. Burada görülən hər bir iş, tikilən hər bir bina və salınan hər bir yaşıllıq doğma torpaqlarımıza olan sevginin təzahürüdür.
17 Oktyabr – Füzuli şəhəri günü həm də gənc nəslin vətənpərvərlik ruhunda tərbiyəsi baxımından böyük əhəmiyyət daşıyır. Bu tarix gənclərə Vətənin azadlığının hansı fədakarlıqlar hesabına əldə olunduğunu xatırladır, onları dövlətçiliyimizin qorunmasına, milli dəyərlərimizə sahib çıxmağa və ölkəmizin inkişafına töhfə verməyə səsləyir.
Füzuli bu gün qəhrəmanlıq tariximizin canlı səhifəsi, milli qürurumuzun və yenilməz iradəmizin rəmzidir. Şəhərin azadlığı Azərbaycan xalqının öz torpağına bağlılığının, dövlətimizin gücünün və ordumuzun qüdrətinin parlaq göstəricisidir.
Səbinə İsgəndərli,
Ağstafa rayon Heydər Əliyev Mərkəzinin əməkdaşı
