2026-cı il oktyabrın 12-də Azərbaycan Respublikasının Prezidenti İlham Əliyev Kamboca Krallığının Baş naziri Hun Manetin Azərbaycana rəsmi səfəri çərçivəsində mətbuata bəyanatla çıxış edib. Bəyanatda Azərbaycan ilə Kamboca arasında siyasi münasibətlərin mövcud vəziyyəti, iqtisadi əlaqələrin genişləndirilməsi, investisiya imkanları, təhsil, nəqliyyat, rəqəmsal transformasiya və beynəlxalq təşkilatlar çərçivəsində əməkdaşlıq məsələləri diqqət mərkəzində olub.
Prezident İlham Əliyev Kambocanın Baş nazirini Azərbaycanda salamlayaraq səfərin iki ölkə arasında dostluq və tərəfdaşlıq münasibətlərinin inkişafına mühüm töhfə verəcəyinə əminliyini ifadə edib. Dövlət başçısı qeyd edib ki, Azərbaycan ilə Kamboca arasında yaxşı siyasi münasibətlər mövcuddur və tərəflər beynəlxalq təşkilatlar çərçivəsində fəal əməkdaşlıq edir, bir-birini dəstəkləyirlər. BMT, Qoşulmama Hərəkatı və Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) çərçivəsində əməkdaşlıq ikitərəfli münasibətlərin mühüm istiqamətlərindəndir.
Prezident İlham Əliyev bəyanatında Azərbaycan ilə Kamboca arasında iqtisadi əlaqələrin mövcud potensialından tam istifadə edilməsinin vacibliyini vurğulayıb. Dövlət başçısının sözlərinə görə, iki ölkə arasında ticarət dövriyyəsi hazırda aşağı səviyyədədir. Bununla belə, qarşılıqlı iqtisadi maraqlar və mövcud imkanlar əməkdaşlığın genişləndirilməsi üçün əlverişli zəmin yaradır.
Bu məqsədlə ticarət və investisiya sahələrində praktiki məsələləri araşdıracaq birgə işçi qrupunun yaradılması barədə razılıq əldə olunub. İlham Əliyev Azərbaycan və Kamboca şirkətlərinin iştirakı ilə keçirilən biznes forumunun qarşılıqlı məlumat mübadiləsinə, iqtisadi prioritetlərin müəyyənləşdirilməsinə və yeni investisiya imkanlarının üzə çıxarılmasına kömək edəcəyini bildirib.
Dövlət başçısı, həmçinin sənayenin müxtəlif sahələrində birgə istehsal müəssisələrinin yaradılması, turizm əlaqələrinin inkişafı və təhsil sahəsində əməkdaşlığın genişləndirilməsi imkanlarına toxunub. Onun fikrincə, coğrafi məsafə müasir dünyada əməkdaşlıq üçün həlledici maneə deyil. Əsas məsələ qarşılıqlı məlumatlılığın artırılması və mövcud imkanların konkret layihələrə çevrilməsidir.
Yunis Eyyubov,
YAP Ağstafa rayon təşkilatının əməkdaşı
