Quruculuq proseslərində ən vacib mərhələlərdən biri düzgün təməl yaratmaqdır. Qarabağda aparılan bərpa işlərinə də bu prizmadan yanaşmaq mümkündür. Bu gün tikilən yollar, evlər, məktəblər, inzibati və sosial obyektlər gələcəkdə formalaşacaq şəhər həyatının təməlini təşkil edir. Ona görə hər bir layihənin uzunmüddətli perspektivə hesablanması xüsusi əhəmiyyət daşıyır.
Bu baxımdan Xankəndidə yaradılması nəzərdə tutulan nəqliyyat infrastrukturu diqqət çəkir. Ağdam–Xankəndi dəmir yolu layihəsi şəhərin gələcək əlaqələrinin genişləndirilməsi ilə yanaşı, Xocalı və Əsgəran kimi ərazilərin də nəqliyyat sisteminə bağlanmasını nəzərdə tutur. Bu, ayrı-ayrı yaşayış məntəqələrinin vahid regional sistemdə inkişaf etdirilməsinə imkan yarada bilər.
Yaşayış fondunun bərpası da həmin təməlin başqa bir hissəsidir. Xocavənddə mövcud evlərin təmiri, Xocalıda yeni fərdi evlərin tikilməsi və sosial infrastrukturun yaradılması qayıdış üçün fiziki baza formalaşdırır. İnsanların qayıtması ilə isə həmin fiziki baza sosial həyata çevrilir.
Qarabağda bu gün qoyulan təməl yalnız binaların təməli deyil. Bu, insanların gələcək həyatının, yeni iqtisadi münasibətlərin, təhsil sisteminin və sosial mühitin təməlidir. Güclü şəhər güclü təməldən başlayır; Qarabağda bu təməl bu gün qurulur, onun üzərində isə Azərbaycanın gələcək şəhərləri yüksələcək.
Nazlı Ələkbərova,
YAP Nizami rayon təşkilatının fəalı
