Şəhərlərin inkişafı yalnız yaşayış binalarının və yolların tikintisi ilə ölçülmür. Müasir şəhərin simasını ictimai məkanlar, parklar, meydanlar, mədəniyyət və istirahət zonaları da müəyyən edir. Qarabağda yeni şəhərlərin formalaşdırılması zamanı bu amillərin nəzərə alınması şəhər mühitinin daha müasir şəkildə qurulmasına imkan yaradır. Xankəndidə Zəfər parkının yaradılması bu baxımdan diqqət çəkən layihələrdən biridir.
Zəfər parklarının mahiyyəti yalnız istirahət məkanı yaratmaqdan ibarət deyil. Belə məkanlar həm də tarixi yaddaşın və müasir dövlətçilik tarixinin ictimai mühitdə ifadəsinə xidmət edir. İnsanların ailələri ilə gəzdiyi, gənclərin vaxt keçirdiyi və müxtəlif tədbirlərin keçirildiyi ictimai məkanlar şəhərin sosial həyatının mühüm hissəsinə çevrilir. Bu baxımdan Zəfər parkları Qarabağın yeni şəhər mədəniyyətinin formalaşmasında xüsusi yer tuta bilər.
Xankəndidə yaradılan Zəfər parkının şəhərin yeni simasının formalaşdırılmasında rolu da bu kontekstdə qiymətləndirilə bilər. Park şəhərin ictimai məkanlarından biri olmaqla yanaşı, Azərbaycanın Zəfər tarixinin yaddaşda saxlanmasına xidmət edir. Eyni zamanda şəhərdə digər infrastruktur layihələrinin həyata keçirilməsi Xankəndinin gələcək şəhər mühitinin kompleks şəkildə formalaşdırıldığını göstərir.
Qarabağda qurulan yeni şəhərlərdə tarix və müasirlik bir arada yaşamalıdır. Bir tərəfdə tarixi yaddaşı qoruyan məkanlar, digər tərəfdə gələcəyin tələblərinə cavab verən məktəblər, yollar və ictimai obyektlər olmalıdır. Şəhər yalnız daş və betondan qurulmur; onu tarix, insan və gələcəyə yönəlmiş həyat tərzi formalaşdırır. Qarabağın yeni şəhərləri də məhz bu anlayış üzərində qurulur.
Emil Novruzov,
YAP Nizami rayon təşkilatının “Oqtay Vəliyev küçəsi, 1” ərazi partiya təşkilatının sədri
