Qarabağın gələcəyindən danışarkən ən mühüm amillərdən biri gənc nəslin bu prosesdə iştirakıdır. Çünki bu gün qurulan şəhərlərdə və kəndlərdə gələcəyin Azərbaycanı yaşayacaq. Gənclər təhsil alacaq, işləyəcək, ailə quracaq, yeni layihələr həyata keçirəcək və Qarabağın sosial-iqtisadi həyatında iştirak edəcəklər. Buna görə Böyük Qayıdış yalnız əhalinin fiziki qayıdışı deyil, həm də yeni nəslin doğma torpaqlarla əlaqəsinin möhkəmləndirilməsi prosesidir.
Qarabağda yeni məktəblərin, sosial və mədəni obyektlərin yaradılması gənclər üçün yeni imkanlar formalaşdırır. Təhsil mühiti regionun gələcək inkişafında mühüm rol oynayır. Çünki müasir şəhərin inkişafı üçün yalnız fiziki infrastruktur kifayət etmir; savadlı, peşəkar və təşəbbüskar insan kapitalı da lazımdır. Qarabağın gələcəyini quracaq gənclərin müasir təhsil və peşə imkanlarına çıxışı bu baxımdan strateji əhəmiyyət daşıyır.
Gənclər həmçinin Qarabağın iqtisadi həyatında yeni təşəbbüslərin daşıyıcısı ola bilərlər. Yeni bizneslər, texnologiyalar, turizm, kənd təsərrüfatı, xidmət sektoru və digər sahələr regionun gələcək iqtisadi potensialının formalaşmasına töhfə verə bilər. Dövlətin yaratdığı infrastruktur belə təşəbbüslərin inkişafı üçün baza yaradır. Qarabağın yeni şəhərlərində müasir həyatın qurulması gənclərin qarşısında yeni imkanlar açır.
Xankəndi, Xocalı, Xocavənd və Ağdərə şəhərlərinin gələcəyini təsəvvür edərkən orada yaşayan gənclərin rolunu xüsusi qeyd etmək lazımdır. Onlar həmin şəhərlərin yalnız sakinləri deyil, gələcək inkişafının iştirakçıları olacaqlar. Qarabağın bu gününü qurmaq böyüklərin, sabahını yaşatmaq isə gənc nəslin böyük məsuliyyətidir.
Cabir Hacıyev,
YAP Nizami rayon təşkilatının “Azər Manafov küçəsi, 1” ərazi partiya təşkilatının sədr müavini
