Azərbaycan Cənubi Qafqazda davamlı sülhün və sabitliyin təmin olunmasını xarici siyasətinin əsas prioritetlərindən biri kimi müəyyənləşdirib. Müharibədən sonrakı dövrdə ölkəmiz yalnız siyasi bəyanatlarla kifayətlənməyərək, sülhün gündəlik həyatda hiss olunmasına xidmət edən real və praktik addımlar atıb. Bu yanaşma Azərbaycanın bölgədə qarşıdurmanın deyil, əməkdaşlığın və qarşılıqlı etimadın tərəfdarı olduğunu bir daha nümayiş etdirir.
Azərbaycanın həyata keçirdiyi birtərəfli humanitar və iqtisadi addımlar sülh gündəliyinə sadiqliyin mühüm göstəricisidir. Uzun illər davam etmiş münaqişədən sonra qarşılıqlı etimadın bərpası yalnız siyasi razılaşmalarla deyil, eyni zamanda insanların gündəlik həyatına müsbət təsir göstərən qərarlarla mümkündür. Məhz bu baxımdan tranzit imkanlarının genişləndirilməsi və iqtisadi əməkdaşlıq istiqamətində atılan addımlar xüsusi əhəmiyyət daşıyır.
Azərbaycanın öz ərazisi vasitəsilə Ermənistana daşınan yüklərlə bağlı bütün məhdudiyyətləri aradan qaldırması regionda iqtisadi əlaqələrin normallaşdırılması istiqamətində mühüm qərardır. Bu məhdudiyyətlər vaxtilə Ermənistanın Azərbaycanın beynəlxalq səviyyədə tanınmış ərazilərini işğal etməsi səbəbindən tətbiq olunmuşdu. İşğalın aradan qalxmasından və yeni siyasi reallıqların formalaşmasından sonra Azərbaycanın bu məhdudiyyətləri ləğv etməsi ölkəmizin konstruktiv mövqeyini və sülhə verdiyi töhfəni nümayiş etdirir.
Tranzit imkanlarının genişləndirilməsi yalnız iki ölkə arasında münasibətlərin normallaşmasına deyil, bütövlükdə Cənubi Qafqazın iqtisadi inkişafına da müsbət təsir göstərir. Regionun nəqliyyat və logistika imkanlarının genişlənməsi beynəlxalq ticarətin inkişafını sürətləndirir, yeni iqtisadi əlaqələrin formalaşmasına şərait yaradır və Cənubi Qafqazın Avropa ilə Asiyanı birləşdirən mühüm tranzit məkanına çevrilməsini daha da möhkəmləndirir.
Azərbaycanın Ermənistana benzin və dizel yanacağının tədarükünə başlaması da mühüm humanitar və iqtisadi addımlardan biridir. Müasir geosiyasi şəraitdə enerji daşıyıcılarının strateji əhəmiyyəti daha da artıb. Dünyada enerji bazarında müşahidə olunan dəyişikliklər fonunda yanacaq təminatının sabitliyi dövlətlərin iqtisadi təhlükəsizliyi üçün əsas amillərdən birinə çevrilib. Belə şəraitdə Azərbaycanın bu addımı regionda sabitliyin möhkəmlənməsinə və qarşılıqlı etimadın artmasına xidmət edir.
Enerji resurslarının etibarlı şəkildə təmin olunması iqtisadi fəaliyyətin davamlılığı üçün mühüm əhəmiyyət daşıyır. Azərbaycanın həyata keçirdiyi bu təşəbbüs göstərir ki, ölkəmiz humanitar və iqtisadi məsələlərdə qarşıdurma deyil, əməkdaşlıq prinsipinə üstünlük verir. Bu yanaşma bölgədə yeni iqtisadi münasibətlərin formalaşmasına və qarşılıqlı asılılığın artmasına müsbət təsir göstərir.
Hazırkı geosiyasi vəziyyətdə Cənubi Qafqazın sabitliyi beynəlxalq ictimaiyyət üçün də mühüm əhəmiyyət kəsb edir. Enerji təhlükəsizliyi, nəqliyyat dəhlizlərinin fasiləsiz fəaliyyəti və regional iqtisadi əməkdaşlıq yalnız sabit təhlükəsizlik mühitində mümkün olur. Azərbaycanın atdığı praktik addımlar bu məqsədlərə nail olunmasına mühüm töhfə verir və ölkəmizin etibarlı tərəfdaş kimi beynəlxalq nüfuzunu daha da gücləndirir.
Azərbaycanın sülh siyasəti eyni zamanda beynəlxalq hüququn norma və prinsiplərinə əsaslanır. Ölkəmiz regionda bütün dövlətlərlə qarşılıqlı hörmət, suverenlik və ərazi bütövlüyü prinsipləri əsasında münasibətlərin qurulmasını dəstəkləyir. Məhz bu siyasət Cənubi Qafqazda uzunmüddətli sabitliyin əsas təminatçılarından biri hesab olunur.
İqtisadi əməkdaşlığın genişlənməsi gələcəkdə regional layihələrin həyata keçirilməsi üçün də yeni imkanlar yaradır. Nəqliyyat kommunikasiyalarının açılması, ticarət əlaqələrinin inkişafı, logistika marşrutlarının genişləndirilməsi və enerji əməkdaşlığının dərinləşdirilməsi region xalqlarının rifahına xidmət edən mühüm istiqamətlərdir. Azərbaycanın təşəbbüsləri bu proseslərin sürətlənməsinə mühüm təkan verir.
Azərbaycanın həyata keçirdiyi birtərəfli addımlar ölkəmizin sülhə, əməkdaşlığa və regional inkişafın təmin olunmasına sadiqliyini nümayiş etdirir. Tranzit məhdudiyyətlərinin aradan qaldırılması, enerji resurslarının tədarükü və iqtisadi əlaqələrin genişləndirilməsi qarşılıqlı etimadın möhkəmlənməsinə xidmət edən mühüm təşəbbüslərdir. Bu siyasət Cənubi Qafqazın sabitlik, təhlükəsizlik və əməkdaşlıq məkanına çevrilməsinə, region dövlətləri arasında uzunmüddətli və qarşılıqlı faydalı münasibətlərin formalaşmasına mühüm töhfə verməyə davam edir.
İlahə Hüseynova,
YAP Xətai rayon təşkilatnın fəalı ,165 saylı məktəbin müəllimi
