Qazaxıstan son illərdə beynəlxalq siyasətdə mühüm oyunçuya çevrilib. Diplomatik çevikliyi və balanslı xarici siyasəti sayəsində ölkə həm regional, həm də qlobal səviyyədə etibarlı tərəfdaş kimi tanınır. Astananın müxtəlif beynəlxalq platformalarda aktiv iştirakı Qazaxıstanın sülh, təhlükəsizlik və inkişaf təşəbbüslərinə verdiyi töhfəni nümayiş etdirir.
Ölkənin BMT, ATƏT və Türk Dövlətləri Təşkilatı kimi qurumlarda fəal mövqeyi onun diplomatik nüfuzunu daha da möhkəmləndirib. Qazaxıstanın vasitəçilik təşəbbüsləri regional münaqişələrin həllində, həmçinin enerji və ərzaq təhlükəsizliyi məsələlərində mühüm rol oynayır. Bu siyasət ölkənin beynəlxalq imicini sülhsevər və etibarlı tərəfdaş kimi formalaşdırır.
İqtisadi cəhətdən də Qazaxıstan beynəlxalq aləmdə öz sözünü deyir. Xarici sərmayələrin artması, böyük logistika layihələrinin həyata keçirilməsi və Orta Dəhlizdə aparıcı mövqeyi ölkəni Avrasiyanın iqtisadi mərkəzinə çevirib. Bu amillər onun iqtisadi diplomatiyasını gücləndirir və beynəlxalq nüfuzunu artırır.
Bu gün Qazaxıstan artıq regional oyunçu deyil, qlobal siyasətdə səsi eşidilən bir dövlətdir. Onun yüksəlişi müstəqillik illərində yürüdülən uzaqgörən siyasətin, daxili sabitliyin və beynəlxalq etimadın məntiqi nəticəsidir.
Ağadadaş Həsənalıyev,
YAP Xəzər rayon təşkilatının fəalı
