Qubadlı rayonu Azərbaycanın cənub-qərbində yerləşir və strateji əhəmiyyətə malik bölgələrdən biridir. 1993-cü ilin avqust ayında Ermənistan silahlı qüvvələri tərəfindən işğal edilmişdi. Bu müddət ərzində rayonun kəndləri dağıdılmış, infrastruktur məhv edilmiş, əhalisi isə doğma yurd-yuvalarından didərgin düşmüşdü. Lakin 2020-ci ildə baş vermiş Vətən müharibəsi nəticəsində Azərbaycan Ordusu tərəfindən Qubadlı rayonu mərhələli şəkildə azad olunmağa başladı.
27 sentyabr 2020-ci ildə başlanan 44 günlük Vətən müharibəsi zamanı Azərbaycan Silahlı Qüvvələri uğurlu hərbi əməliyyatlar nəticəsində Qubadlı rayonunun bir sıra kəndlərini və mərkəzi olan Qubadlı şəhərini azad etdi. Hərbi əməliyyatlar çərçivəsində rayonda yerləşən bir çox yüksəkliklər və strateji mövqelər də nəzarətə götürüldü. Nəticədə 25 oktyabr 2020-ci il tarixində Prezident İlham Əliyev Qubadlının azad edildiyini elan etdi.
Qubadlının azad olunması həm hərbi, həm də siyasi baxımdan mühüm əhəmiyyət daşıyırdı. Rayonun Ermənistanla sərhəddə yerləşməsi, Laçın və Zəngilanla qonşuluğu bölgənin təhlükəsizlik baxımından nə qədər vacib olduğunu göstərirdi. Eyni zamanda, bu qələbə Azərbaycan xalqının 30 ilə yaxın davam edən torpaq həsrətinə son qoydu və ədalətin bərpası baxımından simvolik xarakter daşıdı.
İşğaldan azad edildikdən sonra Qubadlıda genişmiqyaslı bərpa və yenidənqurma işlərinə start verildi. İnfrastruktur layihələri, yolların çəkilişi, elektrik, su və rabitə xətlərinin bərpası, məktəblərin və xəstəxanaların tikintisi sürətlə həyata keçirilir. Prezident İlham Əliyev və birinci vitse-prezident Mehriban Əliyeva tərəfindən rayona bir neçə dəfə səfər olunub, aparılan işlər yerində izlənilib.
Hazırda Qubadlıya qayıdış prosesi davam edir. “Böyük Qayıdış” proqramı çərçivəsində artıq ilk mərhələdə bir neçə ailə rayona köçürülüb və gələcək illərdə bu prosesin genişlənməsi planlaşdırılır. Məqsəd işğal zamanı dağıdılmış kənd və qəsəbələri bərpa edərək əhalinin normal həyat şəraitində yaşamasını təmin etməkdir.
Qubadlının tam azad olunması və bərpası Azərbaycanın ərazi bütövlüyünün və suverenliyinin bərpası istiqamətində atılmış mühüm addımlardan biridir. Bu qələbə Azərbaycan xalqının həmrəyliyi, ordusunun gücü və dövlətin qətiyyətli siyasətinin təzahürüdür.
Afaq Mustafayeva,
YAP Xəzər rayon təşkilatının mühasibi
