AnalitikaGündəmSiyasət

Yeni Azərbaycan Partiyasının yaranması – müasir Azərbaycan dövlətçiliyinin inkişafında mühüm mərhələ

Yeni Azərbaycan Partiyasının (YAP) yaranması Azərbaycanın müasir siyasi tarixində mühüm hadisələrdən biridir. Partiyanın yaradılması ölkəmizin mürəkkəb ictimai-siyasi proseslərdən keçdiyi, dövlət müstəqilliyinin təhlükə ilə üzləşdiyi bir dövrə təsadüf edir.

1990-cı illərin əvvəllərində Azərbaycanda siyasi, iqtisadi və sosial vəziyyət olduqca ağır idi. Ölkədə hökm sürən hakimiyyət böhranı, siyasi qarşıdurmalar, Ermənistanın hərbi təcavüzü və idarəetmədə yaranmış problemlər xalqın gələcəyə olan inamını sarsıtmışdı. Belə bir şəraitdə Azərbaycan cəmiyyətində güclü siyasi liderə və ölkəni böhrandan çıxara biləcək siyasi qüvvəyə böyük ehtiyac yaranmışdı.

Bu tarixi şəraitdə xalqın böyük etimad göstərdiyi görkəmli dövlət xadimi Heydər Əliyevin rəhbərliyi ilə Yeni Azərbaycan Partiyasının yaradılması təşəbbüsü irəli sürüldü. 1992-ci il oktyabrın 16-da Azərbaycanın ziyalıları Heydər Əliyevə müraciət edərək yeni siyasi partiyanın yaradılmasına rəhbərlik etməsini xahiş etdilər. Heydər Əliyev həmin müraciətə cavab verərək partiyanın yaradılmasına razılıq verdi.

1992-ci il noyabrın 21-də Naxçıvan şəhərində Yeni Azərbaycan Partiyasının təsis konfransı keçirildi. Konfransda Heydər Əliyev partiyanın sədri seçildi. Beləliklə, YAP Azərbaycanın siyasi həyatında yeni bir mərhələnin əsasını qoydu.

1993-cü ildə Heydər Əliyevin xalqın təkidli tələbi ilə siyasi hakimiyyətə qayıdışı ölkədə sabitliyin bərqərar olunmasında, dövlətçiliyin möhkəmləndirilməsində və siyasi böhranın aradan qaldırılmasında mühüm rol oynadı. Yeni Azərbaycan Partiyası da sonrakı illərdə ölkənin siyasi həyatında aparıcı qüvvələrdən birinə çevrildi.

Bu gün Yeni Azərbaycan Partiyası Prezident İlham Əliyevin rəhbərliyi ilə fəaliyyətini davam etdirir. Partiyanın siyasi fəaliyyətində dövlət müstəqilliyinin qorunması, milli maraqların müdafiəsi, ölkənin sosial-iqtisadi inkişafı və Azərbaycanın beynəlxalq nüfuzunun artırılması əsas istiqamətlərdəndir.

Yeni Azərbaycan Partiyasının yaranmasının ildönümü yalnız bir siyasi təşkilatın təsis tarixinin qeyd olunması deyil, həm də Azərbaycanın müasir dövlətçilik tarixinin mühüm səhifələrindən birinin xatırlanmasıdır.

Yeni Azərbaycan Partiyasının yaranması Azərbaycan siyasi tarixində yeni bir mərhələnin başlanğıcı olmuş, ölkənin gələcək inkişafı və dövlətçilik ənənələrinin möhkəmləndirilməsi baxımından əhəmiyyətli hadisəyə çevrilmişdir.

Selcan Novruzova,
YAP Nizami rayon təşkilatının məsləhətçisi

Oxşar Xəbərlər

Back to top button