İqtisadi əməkdaşlıq müasir dövlətlərin beynəlxalq mövqelərinin möhkəmləndirilməsində və milli iqtisadiyyatın inkişafında mühüm rol oynayır. Ticarət əlaqələri, enerji layihələri, nəqliyyat dəhlizləri və investisiya tərəfdaşlıqları dövlətlərin iqtisadi potensialını genişləndirir. Azərbaycan Respublikasının Konstitusiyası ölkənin iqtisadi müstəqilliyini və beynəlxalq münasibətlərdə sərbəst fəaliyyətini təmin edən hüquqi əsasları müəyyənləşdirir.
1995-ci ildə qəbul edilmiş Konstitusiya bazar iqtisadiyyatının və mülkiyyət münasibətlərinin hüquqi əsaslarını formalaşdırmaqla Azərbaycanın beynəlxalq iqtisadi əməkdaşlığı üçün əlverişli hüquqi mühit yaratdı. Müstəqil dövlət kimi ölkənin xarici iqtisadi əlaqələr qurması, beynəlxalq investisiyaları cəlb etməsi və milli resurslardan səmərəli istifadə etməsi iqtisadi suverenliyin mühüm elementlərinə çevrildi.
Ümummilli Lider Heydər Əliyevin rəhbərliyi ilə həyata keçirilən enerji strategiyası Azərbaycanın beynəlxalq iqtisadi sistemə inteqrasiyasında mühüm mərhələ oldu. Xarici investisiyaların cəlb edilməsi, enerji müqavilələrinin imzalanması və beynəlxalq tərəfdaşlıqların genişləndirilməsi ölkənin iqtisadi imkanlarını artırdı. Bu strategiya Azərbaycanın regional və qlobal iqtisadi proseslərdə rolunun güclənməsinə şərait yaratdı.
Prezident İlham Əliyevin rəhbərliyi ilə enerji layihələri ilə yanaşı, nəqliyyat və logistika sahəsində də mühüm təşəbbüslər həyata keçirilib. Azərbaycanın Şərq-Qərb və Şimal-Cənub nəqliyyat dəhlizlərində iştirakı ölkənin tranzit imkanlarını genişləndirib. Qeyri-neft sektorunun inkişafı, ixracın şaxələndirilməsi və yeni bazarlara çıxış iqtisadi dayanıqlılığın gücləndirilməsinə xidmət edir.
Beynəlxalq iqtisadi əməkdaşlığın davamlılığı ölkənin hüquqi sabitliyindən, investisiya mühitindən və milli maraqlara əsaslanan siyasətindən asılıdır. Konstitusiya bu proseslərin hüquqi çərçivəsini müəyyənləşdirən əsas sənəddir. Azərbaycanın gələcək iqtisadi strategiyası suveren qərarvermə imkanlarının qorunması və beynəlxalq əməkdaşlıqdan milli inkişaf naminə səmərəli istifadə edilməsi prinsiplərinə əsaslanmalıdır.
Vəfa Bayramova,
YAP Nizami rayon təşkilatının fəal üzvü
