Xalq və ordu birliyi – Qələbəyə aparan mənəvi güc
Azərbaycan xalqının tarixində birlik və həmrəylik həmişə mühüm rol oynayıb. 2020-ci ilin Vətən müharibəsi isə bu milli xüsusiyyətlərin ən parlaq nümunəsinə çevrildi. Müharibənin ilk günlərindən etibarən cəmiyyətin bütün təbəqələri vahid amal ətrafında birləşdi. İnsanları birləşdirən əsas məqsəd torpaqlarımızın işğaldan azad edilməsi və Azərbaycanın ərazi bütövlüyünün bərpası idi.
Prezident İlham Əliyevin qətiyyətli mövqeyi və xalqla davamlı ünsiyyəti bu birliyin möhkəmlənməsində mühüm rol oynadı. Dövlət başçısının müraciətləri, beynəlxalq mediaya verdiyi müsahibələr və cəbhədəki vəziyyətlə bağlı açıqlamaları cəmiyyətdə yüksək ruh yüksəkliyi yaradırdı. Azərbaycan xalqı öz liderinə və ordusuna inamını hər addımda nümayiş etdirirdi.
Cəbhədə döyüşən hərbçilərimizin arxasında milyonlarla insanın mənəvi dəstəyi dayanırdı. Vətəndaşlar şəhid ailələrinə və qazilərə yardım göstərir, könüllü təşəbbüslərdə iştirak edir, ordunun ehtiyaclarının qarşılanmasına töhfə verirdilər. Bu həmrəylik müharibənin yalnız hərbi əməliyyatlardan ibarət olmadığını, bütöv bir xalqın mübarizəsi olduğunu göstərdi.
44 günlük müharibədə əldə olunan Qələbə xalq və ordu birliyinin nə qədər böyük gücə malik olduğunu təsdiqlədi. Azərbaycan əsgəri bilirdi ki, arxasında ona inanan, dəstək verən və qələbəsini gözləyən bütöv bir xalq dayanır. Bu mənəvi dayaq döyüşçülərimizin iradəsini daha da gücləndirirdi.
Bu gün də xalqımızın birliyi Zəfərin qorunması və dövlətimizin inkişafı baxımından xüsusi əhəmiyyət daşıyır. Şəhid ailələrinə, qazilərə göstərilən diqqət, azad edilmiş ərazilərdə həyata keçirilən layihələr və Böyük Qayıdış prosesi milli həmrəyliyin davamıdır. Zəfər Günü bizə bir daha xatırladır ki, birlik olan yerdə xalqın iradəsi qarşısında heç bir maneə dayana bilməz.
Tofiqə Qurbanova,
YAP Nizami rayon təşkilatının “Məmmədəli Şərifli küçəsi, 24/12” ərazi partiya təşkilatının sədr müavini
