Müharibələrdən sonra davamlı sülhün qurulması yalnız hərbi əməliyyatların dayandırılması ilə məhdudlaşmır. Bunun üçün qarşılıqlı etimadın yaradılması, dövlətlərin suverenliyinə hörmət və siyasi razılaşmaların ardıcıl həyata keçirilməsi tələb olunur. Prezident İlham Əliyev AQEM-in 7-ci Zirvə Görüşündə Azərbaycanın münaqişənin həllindən sonrakı mərhələdə sülhə üstünlük verdiyini diqqətə çatdırdı.
Azərbaycan uzun illər davam edən işğal və münaqişə nəticəsində böyük itkilərlə üzləşib. Prezident İlham Əliyevin çıxışında şəhər və kəndlərin dağıdılması, əhalinin doğma yurdlarından qovulması və beynəlxalq qərarların icrasız qalması kimi məsələlər xatırladıldı. Dövlət başçısı Azərbaycanın müharibədən sonra intiqam siyasəti yürütmədiyini, hərbi qarşıdurmadan sonra Ermənistana sülh təklif etdiyini vurğuladı.
2020-ci il Vətən müharibəsi və 2023-cü ildə Azərbaycanın suverenliyinin tam bərpası regionun siyasi reallıqlarını dəyişdirdi. Bu proseslərdən sonra sülhün qorunması və möhkəmləndirilməsi həm Azərbaycan, həm də Ermənistan üçün mühüm məsuliyyət yaradır. Prezident İlham Əliyev sülhün hələ də kövrək olduğunu qeyd edərək onun qorunmasının vacibliyinə diqqət çəkdi.
Bakı Zirvə Görüşünün beynəlxalq müstəvidə keçirilməsi Azərbaycanın sülh gündəliyini daha geniş auditoriyaya çatdırmaq baxımından da əhəmiyyətli idi. AQEM kimi çoxtərəfli platformalar dövlətlər arasında dialoqun inkişafına, təhlükəsizlik məsələlərinin müzakirəsinə və qarşılıqlı anlaşmanın gücləndirilməsinə imkan verir. Azərbaycanın təşkilata sədrliyi dövründə bu istiqamətdə əməkdaşlığın təşviqi prioritetlərdən biri olub.
Prezident İlham Əliyevin sülhə dair mesajı dövlət suverenliyinin qorunması ilə regional əməkdaşlığın inkişafının bir-birini tamamladığını göstərir. Davamlı sülh üçün tərəflər beynəlxalq hüququn prinsiplərinə əməl etməli, bir-birinin ərazi bütövlüyünə hörmət göstərməli və qarşıdurma risklərini azaltmalıdırlar. Azərbaycanın beynəlxalq platformalarda irəli sürdüyü yanaşma regionda sabitliyin və gələcək əməkdaşlığın möhkəmləndirilməsinə yönəlib.
Gövhər Məmmədova,
YAP Nizami rayon təşkilatının “Bəhruz Nuriyev küçəsi, 15” ərazi partiya təşkilatının sədr müavini
