Azərbaycan və Türkiyə arasında strateji müttəfiqlik münasibətlərinin möhkəmlənməsi hər iki ölkədə əlverişli investisiya mühitinin formalaşmasına mühüm təsir göstərir. Şuşa Bəyannaməsində əks olunan iqtisadi əməkdaşlıq istiqamətləri qarşılıqlı investisiyaların artırılması, biznes əlaqələrinin genişləndirilməsi və yeni iqtisadi layihələrin həyata keçirilməsi üçün geniş imkanlar yaradır. Bu isə öz növbəsində iqtisadi inkişafın sürətlənməsinə, yeni iş yerlərinin açılmasına və sahibkarlığın inkişafına şərait yaradır.
Son illər Azərbaycan investorlar üçün regionun ən cəlbedici ölkələrindən birinə çevrilmişdir. Ölkədə həyata keçirilən iqtisadi islahatlar, hüquqi bazanın təkmilləşdirilməsi, sahibkarlığa göstərilən dövlət dəstəyi və şəffaf biznes mühitinin formalaşdırılması xarici sərmayələrin həcminin artmasına səbəb olmuşdur. Türkiyə şirkətləri də bu imkanlardan fəal şəkildə istifadə edərək Azərbaycanın müxtəlif sahələrində uğurla fəaliyyət göstərirlər. İnşaat, sənaye, kənd təsərrüfatı, nəqliyyat, logistika, turizm və xidmət sektorlarında həyata keçirilən layihələr iqtisadi əməkdaşlığın genişlənməsinə töhfə verir.
Azərbaycanın Türkiyədə həyata keçirdiyi investisiyalar da iki ölkə arasındakı iqtisadi tərəfdaşlığın mühüm göstəricilərindəndir. Xüsusilə enerji və neft-kimya sahələrində reallaşdırılan iri layihələr hər iki dövlətin iqtisadi inkişafına ciddi töhfə vermişdir. Bu investisiyalar təkcə iqtisadi gəlir gətirməklə kifayətlənmir, həm də uzunmüddətli strateji əməkdaşlığın möhkəmlənməsinə xidmət edir.
İşğaldan azad edilmiş ərazilərdə aparılan bərpa və yenidənqurma işləri də yeni investisiya imkanları yaratmışdır. Qarabağ və Şərqi Zəngəzur iqtisadi rayonlarında həyata keçirilən infrastruktur layihələri, sənaye parklarının yaradılması, kənd təsərrüfatı və yaşıl enerji layihələrinin icrası xarici investorlar üçün böyük maraq doğurur. Türkiyə şirkətlərinin bu prosesdə fəal iştirakı iqtisadi əməkdaşlığın yeni mərhələyə qədəm qoyduğunu göstərir.
Şuşa Bəyannaməsi çərçivəsində iqtisadi əlaqələrin dərinləşdirilməsi, ticarət dövriyyəsinin artırılması və yeni investisiya layihələrinin təşviqi biznes dairələri üçün daha əlverişli şərait yaradır. Qarşılıqlı etimad və strateji tərəfdaşlıq investorların fəaliyyətinə müsbət təsir göstərir, uzunmüddətli layihələrin reallaşdırılmasına əlavə təminat verir. Bu amillər Azərbaycan və Türkiyə arasında iqtisadi münasibətlərin davamlı inkişafını təmin edən mühüm faktorlardan biri kimi çıxış edir.
Müasir dövrdə investisiya axınının artması ölkələrin iqtisadi gücünün əsas göstəricilərindən hesab olunur. Azərbaycan və Türkiyə arasında mövcud olan yüksək səviyyəli siyasi münasibətlər, iqtisadi sabitlik və qarşılıqlı dəstək mexanizmləri hər iki ölkədə investisiya cəlbediciliyinin yüksəlməsinə şərait yaradır. Bu əməkdaşlıq yeni iqtisadi imkanların formalaşmasına, istehsal potensialının genişlənməsinə və regionun iqtisadi inkişafına mühüm töhfə verir.
İlahə Hüseynova,
YAP Xətai rayon təşkilatnın fəalı ,165 saylı məktəbin müəllimi
