Prezident İlham Əliyevin Əbu-Dabidə “Zayed İnsan Qardaşlığı Mükafatı”nın təqdimolunma mərasimində səsləndirdiyi əsas mesajlardan biri sülhün lokal deyil, regional və qlobal miqyasda dəyər daşıması fikri idi. Bu yanaşma müasir beynəlxalq münasibətlər sistemində xüsusilə aktualdır. Çünki bu gün sülh yalnız iki tərəf arasında imzalanmış sənəd deyil, regionların sabitliyi, xalqların rifahı və beynəlxalq əməkdaşlığın dayanıqlılığı deməkdir.
Azərbaycanın son illərdə nümayiş etdirdiyi siyasi iradə göstərir ki, sülh anlayışı yalnız müharibənin olmaması ilə məhdudlaşmır. Prezident İlham Əliyevin çıxışında vurğulanan əsas məqam ondan ibarət idi ki, davamlı sülh qarşılıqlı etimad, beynəlxalq hüquqa hörmət və suverenlik prinsipinin tanınması üzərində qurulmalıdır. Bu baxımdan Azərbaycan öz təcrübəsini region üçün nümunə kimi təqdim edir: münaqişədən sonra sülh gündəliyinin irəli sürülməsi, əməkdaşlıq çağırışları və gələcəyə yönəlik baxış.
Əbu-Dabidə keçirilən tədbirin özü də simvolik məna daşıyırdı. “Zayed İnsan Qardaşlığı Mükafatı” fərqli mədəniyyətlər, dinlər və xalqlar arasında dialoqu təşviq edən təşəbbüslərə verilir. Prezident İlham Əliyevin burada sülh mövzusunda çıxış etməsi Azərbaycanın multikulturalizm, tolerantlıq və qarşılıqlı hörmət prinsiplərinə sadiqliyini bir daha nümayiş etdirir. Bu dəyərlər təkcə daxili siyasətin deyil, həm də xarici siyasətin əsas sütunları kimi təqdim olunur.
“Bu sülh təkcə iki ölkə üçün deyil, daha geniş region üçün də böyük əhəmiyyət kəsb edir” fikri regional təhlükəsizlik arxitekturasına işarədir. Cənubi Qafqaz kimi strateji əhəmiyyətə malik bir bölgədə sabitliyin bərqərar olması nəqliyyat dəhlizlərinin açılması, iqtisadi inteqrasiyanın güclənməsi və xalqlar arasında təmasların artması deməkdir. Bu isə yalnız region ölkələrinə deyil, Avrasiya məkanında marağı olan bütün tərəflərə müsbət təsir göstərir.
Prezidentin çıxışında humanitar aspekt də xüsusi yer tuturdu. Sülh insan həyatının dəyərini ön plana çıxarır, gələcək nəsillərə münaqişə yox, əməkdaşlıq miras qoymağı hədəfləyir. Bu baxımdan Azərbaycan sülhü siyasi məqsəddən daha çox mənəvi məsuliyyət kimi təqdim edir. İnsan qardaşlığı ideyası ilə sülh anlayışının eyni platformada səslənməsi bu mesajı daha da gücləndirir.
Nəticə etibarilə, Prezident İlham Əliyevin çıxışında ifadə olunan sülh konsepsiyası dar çərçivəli maraqlardan kənara çıxaraq regional sabitlik, beynəlxalq əməkdaşlıq və insan dəyərləri üzərində qurulmuş geniş baxışı əks etdirir. Bu yanaşma göstərir ki, əsl sülh yalnız iki ölkə arasında deyil, bütövlükdə regionun və dünyanın gələcəyi üçün strateji əhəmiyyət daşıyır.
Sevinc Qəhrəmanova,
Yeni Azərbaycan Partiyası,məsləhətçi
