Yanvarın 12-də Azərbaycan Respublikasının Prezidenti İlham Əliyevin sədrliyi ilə “Bakı şəhərində və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026–2035-ci illər üçün Dövlət Proqramı”na həsr olunmuş müşavirə keçirilib. Müşavirədə paytaxt və Abşeron yarımadasında su təsərrüfatının mövcud vəziyyəti, qarşıda duran əsas problemlər və növbəti illər üçün planlaşdırılan tədbirlər ətraflı şəkildə nəzərdən keçirilib. Tədbirdə Bakı şəhəri və Abşeron yarımadasının ölkənin ən sıx məskunlaşmış və strateji əhəmiyyətə malik bölgələrindən biri olduğu diqqətə çatdırılıb. Bu ərazilərdə su təchizatı, yağış və tullantı suları sistemlərinin müasir tələblərə uyğun qurulmasının sosial rifahın yüksəldilməsi, şəhər mühitinin yaxşılaşdırılması və ekoloji tarazlığın qorunması baxımından mühüm əhəmiyyət daşıdığı vurğulanıb. Müşavirə zamanı son illər ərzində su təsərrüfatı sahəsində həyata keçirilmiş layihələrə toxunulub. Yeni su mənbələrinin istismara verilməsi, mövcud infrastrukturun qismən yenilənməsi və tullantı sularının təmizlənməsi istiqamətində görülmüş işlər qeyd olunub.
Bununla yanaşı, bəzi ərazilərdə infrastrukturun köhnəlməsi, yağış sularının idarə olunmasında yaranan çətinliklər və su itkilərinin hələ də aktual problem olaraq qaldığı bildirilib. 2026–2035-ci illəri əhatə edən Dövlət Proqramının əsas məqsədləri sırasında Bakı şəhəri və Abşeron yarımadasında dayanıqlı su təminatının yaradılması, yağış və tullantı sularının effektiv idarə edilməsi, daşqın risklərinin azaldılması və ətraf mühitin mühafizəsi dayanır. Proqram çərçivəsində su təchizatı və kanalizasiya sistemlərinin mərhələli şəkildə yenilənməsi, müasir texnologiyaların tətbiqi və idarəetmənin təkmilləşdirilməsi nəzərdə tutulur. Müzakirələr zamanı Dövlət Proqramının yalnız infrastruktur layihələrini deyil, eyni zamanda institusional inkişafı, sahə üzrə idarəetmə mexanizmlərinin gücləndirilməsini və xidmət keyfiyyətinin artırılmasını da əhatə etdiyi qeyd edilib. Layihələrin icrasında aidiyyəti dövlət qurumları arasında koordinasiyanın gücləndirilməsinin və maliyyə vəsaitlərindən səmərəli istifadənin vacibliyi xüsusi olaraq vurğulanıb.
Qeyd olunub ki, Dövlət Proqramının icrası nəticəsində Bakı şəhəri və Abşeron yarımadasında su təsərrüfatı sahəsində mövcud problemlərin mərhələli şəkildə aradan qaldırılması, əhalinin fasiləsiz və keyfiyyətli su ilə təminatı, yağış və tullantı sularının idarə olunmasında müasir yanaşmaların tətbiqi təmin ediləcək. Eyni zamanda, bu tədbirlər şəhər infrastrukturunun dayanıqlığını artıracaq və ekoloji risklərin minimuma endirilməsinə xidmət edəcək. Müşavirədə vurğulanıb ki, nəzərdə tutulan tədbirlər paytaxtın və Abşeron yarımadasının uzunmüddətli sosial-iqtisadi inkişaf strategiyasının tərkib hissəsi olmaqla, regionda yaşayış mühitinin daha təhlükəsiz və rahat formalaşmasına mühüm töhfə verəcək.
Orxan Abdullazadə,
Yeni Azərbaycan Partiyası, məsləhətçi
