Azərbaycan Polisi ölkəmizin tərəqqisi, xalqımızın azad, firavan və təhlükəsiz yaşaması yolunda hər zaman xidmətdədir
Şübhəsiz ki, hər bir peşənin bir-birindən fərqli xüsusiyyətləri, üstünlükləri və çətinlikləri var. Bu peşələrin içində polisin xidməti çətinliyi və məsuliyyəti ilə seçilir.Polis yaradılanı, bəşər övladını, şərdən qoruyan olduğu üçün mahiyyət etibarilə xeyrin təmsilçisidir. Həkim kimi, müəllim kimi, polis peşəsi də bütün bəşəri anlamları özündə birləşdirir.Polis olmaq şərəfdir. Təkcə Azərbaycanda yox, bütün qabaqcıl ölkələrin həyatında polis təşkilatı hamını maraqlandıran – təhlükəsizlik çətiridir. Azərbaycan polisi ölkədə sabitliyi qorumaq üçün sinəsini sipər etməyə hazırdır. Təkcə müstəqillik illərində 100-ə yaxın polis ictimai asayişi qoruyarkən dünyasını dəyişib. Zəfər tariximiz olan Vətən müharibəsində də 100-lərlə daxili işlər orqanlarının əməkdaşları iştirak edib, cəsarət və igidlik nümunələri göstərib.Bu gün ölkəmizdə ictimai asayişin və ictimai qaydanın keşiyində ayıq-sayıq dayanan Azərbaycan Polisi istənilən təxribatın qarşısının operativ şəkildə alınmasında yüksək peşəkarlığa malikdir.Laçın-Xankəndi yolunda təşkil olunan ekofəalların aksiyasında Azərbaycan Polisi nümunəvi xidmət göstərdi. Polis əməkdaşları aksiya iştirakçılarının təhlükəsizliyini və mühafizəsini yüksək səviyyədə təmin etdi.
Azərbaycan Prezidenti İlham Əliyevin diqqət və qayğısı sayəsində davamlı inkişafda olan daxili işlər orqanları ölkədə cinayətkarlığa, onun transmilli növlərinə qarşı mübarizədə, asayişin və təhlükəsizliyin təmin olunmasında önəmli xidmətləri ilə seçilir. Hazırda Azərbaycan polisi güclü nizam-intizama, yüksək peşəkarlığa malik, müasir maddi-texniki imkanlarla təchiz edilmiş, dövlətçiliyimizin qorunması işində önəmli xidmətləri olan mühüm dövlət təsisatıdır. Cənab Prezidentimizində dediyi kimi “Bizim polis gecə-gündüz soyuqda, istidə, dağda asayişi qoruyur”. Əminliklə deyə bilərik ki, bu gündən sonra da Azərbaycan Polisi ölkəmizin tərəqqisi, xalqımızın azad, firavan və təhlükəsiz yaşaması yolunda gecədə, gündüzdə, soyuqda istidə də daim yüksək səviyyəli xidməti ilə fərqlənəcəkdir.
Rəna Süleymanlı,
YAP-ın gənc fəalı
