Azərbaycan əsgərinin mənəvi gücü – Zəfərin əsas dayağı
Azərbaycan Ordusunun 44 günlük Vətən müharibəsində qazandığı tarixi Qələbə xalqımızın hərb tarixinə qızıl hərflərlə yazıldı. Bu qələbənin əldə olunmasında müasir hərbi texnika və yüksək döyüş hazırlığı ilə yanaşı, Azərbaycan əsgərinin mənəvi gücü, Vətən sevgisi və sarsılmaz iradəsi mühüm rol oynadı. Hər bir hərbçimiz doğma torpaqların azadlığını özünün ən müqəddəs vəzifəsi hesab edirdi.
Ordunun gücü yalnız silah və texnika ilə ölçülmür. Əsgərin döyüş ruhu, komandirə inamı, hərbi intizamı və mənəvi-psixoloji hazırlığı qələbənin əsas şərtlərindəndir. Azərbaycan Ordusunda bu istiqamətdə aparılan ardıcıl işlər Vətən müharibəsi zamanı öz müsbət nəticəsini göstərdi.
Döyüş meydanında hərbçilərimiz böyük çətinliklərlə üzləşsələr də, qarşıya qoyulan məqsəddən dönmədilər. Dağlıq ərazilərdə, mürəkkəb hava şəraitində və ağır döyüş əməliyyatlarında göstərilən qəhrəmanlıq Azərbaycan əsgərinin iradəsini nümayiş etdirdi. Onlar hər qarış torpaq uğrunda böyük fədakarlıq göstərdilər.
Müzəffər Ali Baş Komandan İlham Əliyevin rəhbərliyi altında Azərbaycan Ordusu qarşıya qoyulan hərbi vəzifələri uğurla yerinə yetirdi. Xalqın orduya dəstəyi, hərbçilərimizin yüksək döyüş ruhu və dövlətin güclü müdafiə siyasəti tarixi Qələbənin əsasını təşkil etdi.
Bu gün Azərbaycan əsgərinin qəhrəmanlığı xalqımız üçün sonsuz qürur mənbəyidir. Onların Vətənə sədaqəti gənc nəsil üçün örnək, dövlətimizin təhlükəsizliyi üçün isə mühüm mənəvi dayaqlardan biridir. Zəfər tariximiz Azərbaycan əsgərinin cəsarəti və fədakarlığı ilə daim yaşayacaq.
Zakir Şahverdi,
YAP Nizami rayon təşkilatının fəalı
