Analitika

Ağdamın bərpası Prezident İlham Əliyevin işğaldan azad olunmuş ərazilərin cənnətə çevrilməsi işindəki iradəsini və qətiyyətini nümayiş etdirir

“Vətən müharibəsində əldə edilmiş qələbə nəticəsində imzalanmış üçtərəfli bəyanata əsasən, 2020-ci ilin noyabr ayının 20-də Ağdam rayonunun işğal olunmuş ərazisi Azərbaycana təhvil verilib və bununla da əsaslı şəkildə insan tələfatının qarşısı alınıb. Bu, eyni zamanda, onun göstəricisidir ki, Azərbaycan müharibəni həm döyüş meydanında, həm siyasi müstəvidə qazanıb. Bununla da, Azərbaycan xalqı özü beynəlxalq qanunlarının aliliyini və tarixi ədaləti bərpa edib”.

Bunu “Aktualinfo.az”a açıqlamasında Yeni Azərbaycan Partiyası Nizami rayon təşkilatının sədri Ramil Vəlibəyov deyib.

Ramil Vəlibəyov bildirib ki, 2020-ci il noyabrın 26-da “Ağdamın azad olunmasına görə” medalı təsis edilib və müzəffər Ali Baş Komandan, Prezident İlham Əliyevin sərəncamları ilə Ağdam rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş Azərbaycan Respublikası Silahlı Qüvvələrinin 5790 hərbi qulluqçusu “Ağdamın azad olunmasına görə” medalı ilə təltif olunub. Eyni zamanda, Prezident İlham Əliyevin 31 iyul 2023-cü il tarixli Sərəncamı ilə Azərbaycan Respublikasının işğaldan azad edilmiş əraziləri üzrə şəhər günləri təsis edilib ki, sözügedən Sərəncama əsasən 20 noyabr Ağdam şəhəri günü kimi müəyyən olub.

“Təsadüfi deyildi ki, Ağdamı xarici və yerli jurnalistlər Qafqazın Xirosiması adlandırıblar” – deyən Ramil Vəlibəyov əlavə edib ki, işğaldan azad olunmuş Ağdam erməni vandalizminin şahididir: “Azad edilmiş torpaqlarda hər şey dağıdılıb. Ermənistan qəsdən mədəni və dini abidələrimzi vandalizmə məruz qoyub, təhqir və qarət edib. İşğalçı Ermənistan Cenevrə Konvensiyaları ilə üzərinə düşən öhdəliklərini kobud şəkildə pozaraq, Ağdam rayonunda coğrafi adların dəyişdirilməsi, oradakı mülkiyyətin talan edilməsi və ərazilərin yandırılması kimi qeyri-qanuni əməllər törədib. Ümumiyyətlə, Ermənistan silahlı qüvvələri tərəfindən işğal olunmuş rayonların azərbaycanlı sakinlərinə qarşı etnik təmizləmənin törədilməsi Ermənistanın əsl niyyətinin hərbi təcavüz və işğal yolu ərazi əldə edilməsi olduğunu qabarıq şəkildə nümayiş etdirib”.

Ramil Vəlibəyov diqqətə çatdırıb ki, bir zamanlar “Qafqazın Xirosiması” adlandırılan Ağdam indi cənnətə çevrilməkdədir: “Müzəffər Ali Baş Komandan İlham Əliyevin rəhbərliyi il Ağdamın əvvəlki şöhrəti bu rayona qaytarılacaq. 2020-ci il noyabrın 23-də Ağdam şəhərində Azərbaycan bayrağını qaldıran Prezident İlham Əliyevin demişdi ki, “dağılmış Ağdam şəhəri erməni vəhşiliyinin şahididir. Biz Ağdam şəhərini bərpa edəcəyik, bütün kəndləri bərpa edəcəyik. Heç kimdə bu haqda şübhə olmasın. Bu, böyük iş olacaqdır”. Beləliklə də, bu gün Ağdamın bərpası həyata keçirilən işlər bir daha müzəffər Ali Baş Komandanın və Azərbaycan dövlətinin işğaldan azad olunmuş ərazilərin cənnətə çevrilməsi işindəki iradəsini, qətiyyətini nümayiş etdirir”.

Oxşar Xəbərlər

Back to top button