Düz bir il bundan əvvəl qəhrəman Azərbaycan ordusu dövlət suverenliyini tam bərpa etmişdir. Bir gündən az davam edən antiterror əməliyyatı ilə Azərbaycan beynəlxalq hüquqi zəfər çalaraq öz gücünü bir daha dünyaya göstərdi.
İkinci Qarabağ müharibəsində 90 mindən çox azərbaycanlı iştirak etmiş və 3200- dən çox qəhrəman şəhidlik zirvəsinə ucalmışdır. 44 gün ərzində Ordumuz hər gün irəli gedərək bir addım belə geri atmadan cəsarətlə vuruşdu. Ermənistanda 1200-dən çox fərari olmasına baxmayaraq, Azərbaycan ordusu hər gün zəfər çalaraq irəliləyirdi. Qələbənin qazanılmasında təkcə fiziki yox, həm də mənəvi üstünlüyə ehtiyac var. “Mənəvi üstünlük olmasa , milli düşüncə olmasa, heç bir güclü ordu belə heç vaxt qələbə qazana bilməz “- deyə Ali Baş Komandanımız çıxışında vurğulamışdır. Çətin coğrafi şəraitdə 5-6, bəzi yerlərdə 7 müdafiə xəttini 44 gün ərzində yararaq irəli getmək, Şuşa kimi alınmaz sıldırım qayanı dırmaşıb ,ancaq yüngül silahlardan istifadə edərək azad etmək çox böyük uğur idi. Müasir tarixdə heç bir yerdə buna bənzər peşəkarlıq və qəhrəmanlıq göstərilməmişdir ki, qazandığımız Zəfəri onunla müqayisə edək. Bu Zəfər Azərbaycan xalqının illərlə gözlədiyi arzusu idi.
İkinci Qarabağ müharibəsi və antiterror əməliyyatı Azərbaycanın həm beynəlxalq hüququnu , həm də öz milli qürurunu bərpa etdi. Bütün dünya gördü ki, güclü iradə , peşəkarlıq, vətənpərvərlik, milli ruhda tərbiyə alan gənclərin qarşısında heç bir qüvvə dayana bilməz. İstər bütün Dünya, istərsə də müstəmləkəçilikdən əziyyət çəkən xalqlar gördülər ki, inamla yaşamaq və əsas hədəfləri müəyyənləşdirib onun uğrunda mübarizə aparmaq lazımdır. Qalib olmaq üçün öz gücünə güvənmək, heç kimin qarşısında baş əyməmək, heç kimdən asılı olmamaq ən başlıca meyardır. Demək olar ki, bizi bu işğalla barışdırmaq və öz maraqlarını təmin etmək istəyrdilər. Biz azadlıq müharibəsi apardıq. Nəticəsini isə İkinci Qarabağ müharibəsində gördük. Qarabağı heç görməyən gənclər belə, Qarabağın azad olunması uğrunda canlarını verdilər. Bundan sonra da biz müəllimlərin əsas vəzifəsi uşaqların, gənclərin biliyini artırmaqla yanaşı, onların vətənpərvərlik ruhunda tərbiyəsi üçün səmərəli və fəal işləməkdir. Bizdən sonra gələn nəsil bizə olan təzyiqi, ikiüzlülüyü, riyakarlığı bilməli və unutmamalıdır.
Hərb meydanında sözünü deyən gəncliyimiz elm və biliyi ilə də dünyaya nümunə olmalıdır deyə düşünürəm. Bu istiqamətdə Qarabağ Universitetinin yaradılması tarixi hadisədir. Hal-hazırda ölkəmizin müxtəlif bölgələrindən olan 1200 tələbə burada təhsil alır. Tarixi torpaqlarımızda ermənilərin kütləvi şəkildə köçürülməsi XIX əsrin əvvələrində imzalanan “Kürəkçay”, “Gülüstan” və “Türkmənçay” müqavilələrinə əsasən olmuşdur. Bu tarixi faktdır. Lakın ermənilər hər zaman bunu təhrif etməyə çalışırlar. Dünya ölkələrini, beynəlxalq ictimaiyyəti yalan məlumatlara inandırmağa çalışırlar. Xalqımıza qarşı bitmək bilməyən düşmənçilik addımları daha sonra 1923-cü ildə olmuşdur. Həmin ildə ölkəmizin tərkibində “Dağlıq Qarabağ Muxtar Vilayəti”nin yaradılması və üç il əvvəl Qərbi Zəngəzurun alınması da bu addımların davamı idi. Həmin vaxtdan etibarən kütləvi erməniləşdirmə siyasəti aparılırdı.
Ulu öndər Heydər Əliyev 1969-cu ildə hakimiyyətə gəldikdən sonra separatçıların yuvaları dağıldı və sabitlik yarandı. Heydər Əliyevin apardığı siyasət nəticəsində yollar çəkildi, infrastruktur yaradıldı və azərbaycanlıların sayı Qarabağ ərazisində artırıldı. 1987-ci ildə istefaya göndərildikdən sonra separatçılar yenidən baş qaldırdı və bu xalqımıza baha başa gəldi. 1993-cü ildə Ulu Öndərin təkrar Azərbaycana hakimiyyətə gəlməsi ilə Azərbaycanın dünya xəritəsindən silinmə ehtimalı yox oldu. Sabitlik yarandı və yeni inkişaf yoluna qədəm qoyuldu.
Quruculuq və inkişaf işlərinin məntiqi nəticəsi 8 Noyabr – Zəfər Günümüzdür. Şuşanın azad edilməsi , Ermənistan kapitulyasiyası və ondan sonrakı tarix göz qabağındadır. 2020-ci ilin noyabrından 2023-cü ilin sentyabrına qədər hər bir addım təhlil edilsə, hər sonrakı addım əvvəlki addımın məntiqi davamıdır və hər bir addımın son məqsədi 20 Sentyabr–Dövlət Suverenliyi Günü idi.
Cavid Cəfərzadə,
Xəzər rayonu, H.İskəndərov adına 206 nömrəli tam orta məktəbin direktoru
