2026-cı il oktyabrın 27-də Bakıda “Ortaq gələcək naminə dialoq: parçalanmış dünyada körpülərin qurulması” mövzusuna həsr olunmuş VII Ümumdünya Mədəniyyətlərarası Dialoq Forumu öz işinə başlayıb. Forumun açılış mərasimində Azərbaycan Respublikasının Prezidenti İlham Əliyev çıxış edərək mədəniyyətlərarası münasibətlərin inkişafı, multikulturalizm, beynəlxalq əməkdaşlıq və qlobal təhlükəsizlik məsələlərinə toxunub. Tədbirdə 100-dən çox ölkədən 2 mindən artıq iştirakçının, o cümlədən 500-dən çox xarici qonağın qeydiyyatdan keçməsi forumun beynəlxalq əhatəsini göstərir.
Müasir beynəlxalq münasibətlər sistemində strateji diplomatiya dövlətlər arasında qarşılıqlı anlaşmanın möhkəmləndirilməsi, münaqişələrin qarşısının alınması və ortaq maraqların müəyyənləşdirilməsi baxımından mühüm əhəmiyyət daşıyır. Prezident İlham Əliyevin çıxışında da dialoqun və qarşılıqlı hörmətin beynəlxalq münasibətlərdəki rolu ön plana çəkilib. Dövlət başçısı forumun illər ərzində müxtəlif ölkələri və mədəniyyətləri bir araya gətirən inklüziv platformaya çevrildiyini vurğulayıb.
Mədəniyyətlərarası dialoq yalnız fərqli xalqların adət-ənənələrini tanımaq vasitəsi deyil, eyni zamanda siyasi və dini fikir ayrılıqlarının dinc yollarla müzakirəsi üçün imkan yaradan mühüm mexanizmdir. Beynəlxalq əməkdaşlığın gücləndirilməsi, etimad mühitinin formalaşdırılması və münaqişələrin sülh yolu ilə həlli üçün dialoqun davamlı xarakter daşıması vacibdir.
Prezidentin çıxışında Azərbaycanın tarixən Avropa ilə Asiya arasında mədəni körpü rolunu oynaması xüsusi qeyd olunub. Dövlət başçısı ölkədə müxtəlif etnik və dini qrupların birgəyaşayış ənənələrinə, qarşılıqlı hörmətə və ictimai həmrəyliyə diqqət çəkib. Bu yanaşma Azərbaycanın beynəlxalq mədəniyyətlərarası dialoq təşəbbüslərinin əsas istiqamətlərindən biri kimi təqdim edilib.
Bu baxımdan, 2008-ci ildən həyata keçirilən Bakı Prosesi xüsusi əhəmiyyətə malikdir. Proses müxtəlif dövlətləri, beynəlxalq təşkilatları, dini icmaları və vətəndaş cəmiyyəti nümayəndələrini ortaq müzakirələr ətrafında birləşdirən təşəbbüs kimi çıxış edir. Belə platformalar mədəni fərqliliklərin qarşıdurma səbəbinə deyil, əməkdaşlıq və qarşılıqlı zənginləşmə mənbəyinə çevrilməsinə şərait yaradır.
Yunis Eyyubov,
YAP Ağstafa rayon təşkilatının əməkdaşı
