17 Oktyabr – Füzuli Şəhəri Günü azadlığın insan həyatına gətirdiyi dəyişiklikləri, torpağa qayıdışın müqəddəsliyini və quruculuğun yaratdığı ümidləri özündə birləşdirən əlamətdar gündür. Bu tarix Azərbaycan xalqının öz torpaqlarına sahib çıxmaq əzminin, milli iradəsinin və dövlətçilik ənənələrinin təntənəsini ifadə edir. Füzuli uzun illər işğalın ağrılarını yaşamış, doğma sakinlərindən ayrı düşmüş, dağıntılarla üz-üzə qalmışdır. Lakin xalqımızın qəlbində bu şəhərə olan sevgi heç zaman azalmamış, azadlıq ümidi hər zaman yaşamaqda davam etmişdir.
İllərin həsrəti ilə yaşayan insanların doğma torpaqlarına qovuşmaq arzusu Azərbaycan xalqının mənəvi gücünü göstərən ən təsirli nümunələrdəndir. Füzulinin azad edilməsi həmin arzunun gerçəkləşməsi, uzun müddət davam edən nisgilin qürurla əvəz olunması demək idi. Bu tarixi qələbə Azərbaycan Ordusunun misilsiz şücaəti, əsgərlərimizin qəhrəmanlığı və xalqımızın birliyi sayəsində mümkün oldu. Vətən uğrunda canlarını fəda edən şəhidlərimizin adı bu torpağın hər qarışında ehtiramla anılır. Onların göstərdiyi fədakarlıq Füzulinin azadlıq tarixinin ən müqəddəs səhifələrindən birini təşkil edir.
Bu gün şəhərdə aparılan genişmiqyaslı quruculuq işləri həyatın yenidən bərpa olunmasının əyani göstəricisidir. Müasir yollar, yaşayış evləri, ictimai məkanlar və sosial obyektlər Füzulinin gələcək inkişafına xidmət edir. Şəhər yenidən qurularkən onun tarixi yaddaşının qorunması, sakinlərin ehtiyaclarının nəzərə alınması və davamlı inkişafın təmin edilməsi mühüm əhəmiyyət daşıyır. Hər yeni layihə insanların doğma yurdlarına daha inamla qayıtmasına, ailələrin öz ocaqlarında yenidən həyat qurmasına və bölgənin iqtisadi imkanlarının genişlənməsinə töhfə verir.
Füzuli bu gün Azərbaycanın yenidən doğuluş ruhunu nümayiş etdirən şəhərlərdən biridir. Burada hər bir abadlıq işi gələcəyə ünvanlanan ümid, hər bir yeni tikili həyatın qələbəsi, hər bir inkişaf layihəsi isə dövlətimizin gücünün ifadəsidir. 17 Oktyabr münasibətilə şəhidlərimizin əziz xatirəsini ehtiramla yad edir, qazilərimizə minnətdarlığımızı bildiririk. Qoy Füzulinin səmasında dalğalanan Azərbaycan bayrağı daim azadlığımızın, müstəqilliyimizin və birliyimizin rəmzi olaraq ucalıqda dalğalansın. Bu şəhərin gələcəyi quruculuq, tərəqqi və firavanlıqla zəngin olsun.
Aysel Quliyeva,
YAP Xəzər rayon təşkilatının fəalı
