Müasir dünyada beynəlxalq hüquq normalarının işlək mexanizmlərinin bərpası çox vaxt ədalətsizliklərlə üzləşir. Lakin 20 sentyabr antiterror tədbirləri BMT Təhlükəsizlik Şurasının məlum qətnamələrinin məhz Azərbaycan tərəfindən təkbaşına və ədalətli şəkildə həyata keçirildiyi unikal tarixi presedent yaratdı. Ölkəmiz beynəlxalq hüququn ona verdiyi legitim hüquqlardan istifadə edərək ərazi bütövlüyünü bərpa etdi.
Bu haqq mübarizəsinin və beynəlxalq hüquqi əsaslandırmanın arxasında şəxsən Prezident İlham Əliyevin dəmir məntiqi və ardıcıl siyasəti dayanır. Dövlət başçısı bütün beynəlxalq tribunalardan Azərbaycanın haqlı olduğunu hüquqi sənədlərlə və təkzibedilməz dəlillərlə sübuta yetirdi. Prezident İlham Əliyev nümayiş etdirdi ki, beynəlxalq hüquq kağız üzərində qalmamalı, real həyatda öz əksini tapmalıdır.
Azərbaycanın atdığı addımların beynəlxalq hüquqa tam uyğun olması, xarici qüvvələrin əməliyyata qarşı hər hansı hüquqi etiraz səsləndirməsinin qarşısını aldı. Ölkəmiz başqasının torpağına deyil, məhz öz tanınmış sərhədləri daxilindəki suveren hüquqlarına sahib çıxdı. Bu, qlobal miqyasda haqqın və ədalətin güc tətbiqi ilə bərpa olunmasının ən mükəmməl nümunəsidir.
20 Sentyabr Dövlət Suverenliyi Günü beynəlxalq hüququn və tarixi ədalətin tam bərqərar olduğu qürur tarixidir. Prezident İlham Əliyev tərəfindən qorunan və təmin edilən bu haqq ədalət prinsipləri, müstəqil Azərbaycanın beynəlxalq arenada hər zaman başıuca olmasını təmin edir.
Ülkər Məmmədova,
YAP Nizami rayon təşkilatının “Azər Manafov küçəsi, 130” ərazi partiya təşkilatının sədr müavini
