11 fevral 2026-cı il tarixində keçirilən “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirədə Yeni Azərbaycan Partiyasının Sədri, Prezident İlham Əliyevin səsləndirdiyi “Süni intellektin tətbiqi dövlət qurumlarında geniş vüsət almalıdır” fikri Azərbaycanın rəqəmsal transformasiya mərhələsində prioritet istiqamətlərin aydın şəkildə müəyyənləşdirildiyini göstərir. Bu yanaşma yalnız texnoloji yenilik deyil, həm də idarəetmə səmərəliliyinin artırılmasına, şəffaflığın gücləndirilməsinə və vətəndaş məmnunluğunun yüksəldilməsinə xidmət edən strateji kursdur.
Müasir dövrdə süni intellekt texnologiyaları dövlət idarəetməsinin ayrılmaz komponentinə çevrilir. Elektron xidmətlərin optimallaşdırılması, məlumatların sürətli təhlili, qərar qəbuletmə prosesinin avtomatlaşdırılması və bürokratik maneələrin azaldılması süni intellektin tətbiqi ilə daha effektiv şəkildə həyata keçirilə bilər. Dövlət Başçımızın vurğuladığı kimi, dövlət qurumlarında bu texnologiyaların geniş tətbiqi idarəetmədə operativliyi artıracaq, resurslardan daha səmərəli istifadəni təmin edəcək və dövlət xidmətlərinin keyfiyyətini yüksəldəcəkdir.
Süni intellekt alətlərinin tətbiqi idarəetmədə şəffaflıq mexanizmlərini gücləndirir. Avtomatlaşdırılmış sistemlər insan amilindən irəli gələn subyektivliyi minimuma endirir, sənədlərin emalını sürətləndirir və qərarların izlənilə bilənliyini təmin edir. Bu isə korrupsiya risklərinin azalmasına, dövlət-vətəndaş münasibətlərində etimadın möhkəmlənməsinə və xidmətlərin ədalətli şəkildə təqdim olunmasına şərait yaradır.
Dövlət sektorunda süni intellektin tətbiqi özəl sektora da müsbət təsir göstərir. İnnovativ həllərin dövlət səviyyəsində tətbiqi ölkədə texnoloji ekosistemin inkişafını sürətləndirir, startapların və yerli IT şirkətlərinin fəaliyyətinə yeni imkanlar yaradır. Bu istiqamət həm də yüksək ixtisaslı kadr hazırlığını stimullaşdırır, rəqəmsal iqtisadiyyatın genişlənməsinə və yeni iş yerlərinin yaranmasına səbəb olur.
Süni intellekt əsaslı sistemlər vətəndaş müraciətlərinin daha sürətli cavablandırılmasına, xidmətlərin fərdiləşdirilməsinə və sosial ehtiyacların daha dəqiq müəyyən edilməsinə imkan verir. Bu, dövlət xidmətlərinin keyfiyyətini artırmaqla yanaşı, vətəndaşların gündəlik həyatını asanlaşdırır və idarəetməni daha əlçatan edir. Beləliklə, rəqəmsal dövlət modeli yalnız texnoloji yenilik deyil, sosial rifahın yüksəldilməsinə yönəlmiş kompleks yanaşma kimi çıxış edir.
Prezident İlham Əliyevin müşavirədə səsləndirdiyi bu fikir Azərbaycanın gələcək inkişaf kursunun əsas istiqamətlərindən birini müəyyənləşdirir. Süni intellektin dövlət idarəçiliyinə geniş inteqrasiyası ölkənin rəqəmsal suverenliyini möhkəmləndirəcək, beynəlxalq rəqabət qabiliyyətini artıracaq və idarəetmədə innovativ yanaşmaların tətbiqini sürətləndirəcəkdir.
Ziya Vəliyev,
YAP Şəki rayon təşkilatının sədr müavini
