26 avqust Laçın şəhəri günü kimi qeyd edilir və bu tarix Azərbaycan dövlətçiliyi üçün əlamətdar bir hadisədir. Prezident İlham Əliyevin Sərəncamı ilə təsdiqlənən bu gün, xalqın əzmkarlığı, mübarizə ruhu və qələbəsini əks etdirir.
Laçın yalnız tarixi baxımdan deyil, strateji mövqeyi ilə də önəmlidir. 1992-ci ildən işğal altında olan rayonun azad edilməsi, uzun illərin həsrətini bitirdi. Yüksəkliklər, yollar və təbii sərvətlər Laçının Azərbaycanın təhlükəsizliyi üçün əvəzolunmaz əhəmiyyətini göstərirdi. İşğal dövründə isə şəhər Ermənistan üçün əsas logistika və əlaqə mərkəzi idi.
44 günlük Vətən müharibəsi Azərbaycanın gücünü ortaya qoydu. 2020-ci il noyabrın 10-da imzalanan Üçtərəfli Bəyanatla Ermənistan məğlubiyyətini tanıdı, Laçın rayonu isə 1 dekabr 2020-ci ildə azad edildi. Bu, Ali Baş Komandan İlham Əliyevin rəhbərliyi altında ordumuzun qəhrəmanlığının və xalqın birliyinin nəticəsi idi.
2022-ci il avqustun 26-da Laçın şəhəri, Zabux və Sus kəndlərinin tam nəzarəti Azərbaycan tərəfindən təmin edildi. 2023-cü ilin aprelində sərhəd-keçid məntəqəsinin açılması isə dövlətimizin sərhədlərinə tam nəzarətini möhkəmləndirdi və beynəlxalq hüquqa uyğun idarəetmə imkanlarını artırdı.
Bərpa prosesində şəhər və kəndlər müasir infrastruktura sahib olur. Yeni evlər, məktəblər, xəstəxanalar, uşaq bağçaları və mədəniyyət müəssisələri sakinlərin rahatlığını təmin edir. Kənd təsərrüfatı və turizm sahəsində yaradılan imkanlar bölgənin iqtisadiyyatına canlılıq gətirir.
Laçın Beynəlxalq Hava Limanı isə bölgənin beynəlxalq əlaqələrini və turizm potensialını artırır. Müasir uçuş-enmə zolağı və terminal infrastrukturu Laçını regional və qlobal məkana bağlayır, iqtisadi və təhlükəsizlik baxımından strateji əhəmiyyət daşıyır.
Beləliklə, Laçın azadlıqdan sonra yeni həyatın, milli qürurun və dövlətin gücünün simvoluna çevrilmişdir. Laçın günü isə bu nailiyyətlərin hər birinin təcəssümüdür.
Faiq Xələfov,
Yeni Azərbaycan Partiyasının fəalı
