Prezident İlham Əliyevin Ağ Evdəki çıxışı Azərbaycan–ABŞ münasibətlərində yeni bir səhifə açdı. Vaşinqtonda keçirilən görüşlər nəticəsində iki ölkə arasındakı əlaqələr rəsmi şəkildə “strateji tərəfdaşlıq” səviyyəsinə yüksəldi. Bu, sadəcə protokol jesti deyil, real siyasi qərarlar və gələcək layihələrlə dəstəklənəcək bir mərhələnin başlanğıcıdır.
Dövlət başçısı bəyan etdi ki, Azərbaycan yalnız regionun enerji və nəqliyyat qovşağı olmaqla kifayətlənməyəcək, həm də ABŞ-la innovasiya və texnologiya sahələrində sıx əməkdaşlıq qurmağa hazırdır.
Səfərin ən mühüm siyasi nəticələrindən biri ABŞ Konqresinin 1992-ci ildən qüvvədə olan, Azərbaycanın maraqlarına zidd Section 907 məhdudiyyətini tamamilə ləğv etməsi oldu. Bu addım Vaşinqtonun Azərbaycanın suverenliyinə və beynəlxalq mövqeyinə verdiyi yüksək qiymətin göstəricisi kimi dəyərləndirilir. Prezident İlham Əliyev bu barədə dedi:
“Uzun illər ədalətsiz şəkildə tətbiq olunan bu məhdudiyyətin aradan qaldırılması, Azərbaycanın dünyada qazandığı nüfuzun nəticəsidir.”
Ağ Evdə aparılan danışıqlar zamanı Azərbaycan və Ermənistan liderləri Cənubi Qafqazda onilliklərdir davam edən münaqişənin siyasi yolla həllinə dair prinsipial razılaşma əldə etdilər. Sülh müqaviləsinin ilkin mətnində sərhədlərin qarşılıqlı tanınması əsas baza kimi təsbit olundu. İlham Əliyev vurğuladı ki, hərbi qələbə ədaləti bərpa etsə də, diplomatik razılaşma bu ədaləti möhkəmləndirəcək.
Bundan əlavə, ABŞ-ın təşəbbüsü ilə reallaşacaq və “Trump Route” adlandırılan yeni nəqliyyat dəhlizi Naxçıvanı Azərbaycanın əsas hissəsinə birləşdirəcək. Bu layihə yalnız bir yol inşası deyil – regionun iqtisadi xəritəsini dəyişdirəcək, geosiyasi təsir balansına ciddi düzəliş edəcək strateji bir addımdır.
Səfərin yekununda ABŞ-da fəaliyyət göstərən Azərbaycan jurnalistlərinə açıqlama verən Prezident İlham Əliyev, bunun təkcə bugünkü siyasi nəticələrlə deyil, həm də gələcək onilliklər üçün regionun geosiyasi taleyi ilə bağlı həlledici mərhələ olduğunu bildirdi:
“Biz tarixi prosesin içindəyik. ABŞ-ın Azərbaycana göstərdiyi bu dəstək, xalqımızın illərdir apardığı mübarizənin bəhrəsidir.”
Bu səfər, Azərbaycanın beynəlxalq siyasi sistemin aktiv oyunçusuna çevrildiyini nümayiş etdirdi. Yeni razılaşmalar, strateji layihələr və diplomatik qələbələr göstərir ki, Azərbaycan öz milli maraqlarını qlobal müstəvidə qorumağa və inkişaf etdirməyə qadir olduğunu sübut edib.
Həsənova Səbinə
YAP-ın gənc fəalı
