2025-ci il iyulun 19-da Azərbaycan Respublikasının Prezidenti İlham Əliyev Xankəndidə “Rəqəmsal keçidlər: Süni intellekt dövründə informasiya və media dayanıqlılığının gücləndirilməsi” mövzusunda keçirilən III Şuşa Qlobal Media Forumunun iştirakçıları ilə görüş keçirib. Bu görüş, yalnız informasiya sahəsində aktual çağırışlara toxunmaq baxımından deyil, həm də Azərbaycanın postmünaqişə dövründə Xankəndidə dövlət suverenliyini faktiki və siyasi olaraq bir daha nümayiş etdirməsi baxımından olduqca mühüm əhəmiyyətə malikdir.
Prezident İlham Əliyevin forum iştirakçıları ilə məhz Xankəndidə görüş keçirməsi, Xankəndidə beynəlxalq səviyyəli tədbirin təşkil olunması bu şəhərin artıq sülh, inkişaf və əməkdaşlıq rəmzinə çevrildiyini nümayiş etdirir. Bu addım həm də regionda sabitlik və normallaşma prosesinin Azərbaycan tərəfindən uğurla idarə olunduğunun bariz nümunəsidir. Eyni zamanda Prezident İlham Əliyevin Xankəndidə forum iştirakçıları ilə görüşü, həm də simvolik məna daşıyırdı. Bu, bir tərəfdən Azərbaycanın Qarabağ üzərində suverenliyinin bərqərar olunmasını və bölgənin yeni inkişaf mərhələsinə qədəm qoyduğunu göstərir. Digər tərəfdən isə beynəlxalq media nümayəndələrinin bu görüşdə iştirakı, regionda baş verən real proseslərin beynəlxalq ictimaiyyətə birbaşa çatdırılması baxımından mühüm rol oynayır.
Görüş zamanı Prezident İlham Əliyev forum iştirakçılarının suallarını cavablandırıb və müasir qlobal məsələlərlə bağlı öz fikirlərini bölüşüb.
Prezident İlham Əliyev rəqəmsal texnologiyaların sürətli inkişafının informasiya təhlükəsizliyi və media dayanıqlılığı sahəsində yaratdığı çağırışlara xüsusi diqqət ayırmış, süni intellekt əsasında formalaşan yeni informasiya mühitinin həm imkanlar, həm də təhlükələr yaratdığını və bu məsələnin bütün beynəlxalq ictimaiyyətin qarşısında duran qlobal bir məsələ olduğunu bildirmişdir.
Prezidentin fikrincə, bu çağırışlarla mübarizə yalnız qlobal əməkdaşlıq və texnoloji suverenlik prinsiplərinə əsaslanan milli siyasətlə mümkündür. İlham Əliyev vurğuladı ki, Azərbaycan informasiya texnologiyaları sahəsində dayanıqlı və müstəqil infrastruktur qurmaqla bu sahədə irəliləyiş əldə edir və süni intellektin tətbiqinə böyük diqqət yetirir.
Prezident İlham Əliyev Azərbaycan mediasının bu sahədə üzərinə düşən missiyanı layiqincə yerinə yetirdiyini, Qarabağ həqiqətlərinin və Azərbaycanın sülh təşəbbüslərinin beynəlxalq aləmə çatdırılmasında mühüm rol oynadığını qeyd etdi. O, xüsusilə qeyd etdi ki, yeni dövrdə süni intellektin medianın fəaliyyətinə təsiri daha da artacaq və bu, informasiya mənbələrinin məsuliyyətini daha da yüksəldəcək.
Görüşdə Prezident İlham Əliyev Azərbaycanın milli maraqlara əsaslanan xarici siyasət kursu barədə danışmış, dünyanın əksər ölkələri ilə əlaqələrin perspektivləri barədə məlumat vermiş, xüsusilə, Azərbaycan-Çin münasibətləri barədə də əhəmiyyətli fikirlər səsləndirmişdir.”Azərbaycanla Çin hər zaman bir-birinin ərazi bütövlüyünü və suverenliyini dəstəkləyib”.
Azərbaycan açıq şəkildə bildirir ki, Çin Xalq Respublikasının Tayvan və digər məsələlər ilə bağlı mövqeyini dəstəkləyir. Bizim mövqeyimiz olan “vahid Çin” siyasəti Çin rəhbərliyinə və xalqına yaxşı məlumdur. Ticarət dövriyyəsinin artırılmasına dair böyük planlarımız var. Hazırda bu istiqamətdə böyük potensial mövcuddur. Artıq Çinin bir çox şəhərlərindən Azərbaycana və Azərbaycan ərazisindən Qərbə konteyner qatarları göndərilir. Bu qatarların sayı ildən-ilə hətta onlarla faiz artmaqdadır. Hesab edirəm ki, yaxın zamanda bu göstəricilər dəfələrlə artacaq. Biz cənab Si Cinpinin irəli sürdüyü “Bir kəmər, bir yol” təşəbbüsünü əvvəldən dəstəkləmişik və bu məqsədlə ölkəmizdə uyğun nəqliyyat-logistika infrastrukturunu hazır etmişik.”
Çin ilə qurulan strateji tərəfdaşlıq münasibətləri Azərbaycanın müasir dövrün texnoloji və iqtisadi çağırışlarına daha çevik uyğunlaşmasında mühüm rol oynayır, xüsusilə, Çin Xalq Respublikasının təşəbbüsü ilə irəli sürülən “Bir kəmər, bir yol” layihəsində Azərbaycanın fəal iştirakı iki ölkə arasındakı əməkdaşlığın inkişafına töhfə verir.
Ümumi olaraq qeyd etmək olar ki, Prezident İlham Əliyevin 19 iyul 2025-ci ildə Xankəndidə keçirilən görüşdə səsləndirdiyi fikirlər, Azərbaycanın informasiya siyasətində qlobal trendləri necə izlədiyini, texnoloji dəyişikliklərə necə uyğunlaşdığını və beynəlxalq əməkdaşlığa necə önəm verdiyini bir daha təsdiqlədi. Süni intellekt dövründə informasiya dayanıqlılığı və media etikası məsələlərinə verdiyi önəm, Prezidentin bu sahəyə strateji yanaşmasının təzahürüdür.
Daşqın Mikayılov
Yeni Azərbaycan Partiyası Şəki rayon təşkilatının sədri
